الشكيري مدير الديجيطال ب"دوزيم" اللي مشى فابور يدير السياحة فاستراليا وتحول لمحرض ضد "شوف تيفي" وشكام لدوك لكلونات. ها نصائحو لوحدة ف"الفرقة" باش تهاجم القناة

يوم الاربعاء 26 يوليوز بريسيبسيون اوطيل "هوليداي ان اكبسبرس" بمدينة اديلاد الاسترالية كان ماتش كندا ضد ايرلندا عن مونديال السيدات وكان مدير الماركوتينگ والديجيطال عادل الشكيري مع وحدة كتهدر بصوت عالي. هاد الشكيري اللي حضورو فاستراليا فضيحة بوحدها كان كينصح هاديك اللي كتغوت على كيفاش ترد على انتقادات يمكن دارتها "شوف تيفي" ليهم.
القناة كانت نشرات غير على غضب المؤثرين والمؤثرات من حضور بحال هادوك ديال الفرقة. لكن هادي ما دازتش لولاد وبنات لفشوش واللي معاهم.
البنت ديال الفرقة كيف كتبان من هدرتها قالت كيف حضرات لهاد الشي "كود" بلا ما يردو البال باللي كيهدرو فريسيبسيون والناس كتفرج فالماتش٬ باللي غادية تطلب من دراري الفرقة ودرياتها هادك عبيدات جوج وسلوى وهند٬ باش يديرو شي رد على "شوف تيفي" ب"ذكاء" كيف قالت. الذكاء عندها هي فالحلقة اللي كدوز ف"دوزيم"٬ يهدرو علي الصحافة اللي كتستهدف الناس وما كديرش خدمتها كيف كتشوفها جاهلة اصلا منتحلة صفة هي واللي معاها فالفرقة. هاد السيدة كيف عاينات "كود" كتقول باللي سعد عبيد محسود لانو قاري ومزيان فيما "شوف تيفي" عزيز عليها غير لفضايح ولحوايج الخايبين.
هنا دخل كاري حنكو لهاد الفرقة عادل الشكيري٬ ونصح لهاد لمرا اللي ما عرفناش هويتها بالضبط٬ باللي هاد الشي ما يديروش فالحلقة اللي غادية دوز ف"دوزيم" ولكن يديرو كل واحد فالحسابات الشخصية ديالهم علي وسائل التواصل الاجتماعي. هاد الشي حضرات ليه "كود" وسمعاتو والسبب هو الغوت ديال ديك لمرا فاستقبال لوطيل.
دابا كيفاش دوزيم ترسل بحال هادا. كيكون معاهم فين ما مشاو. كيمشي معاهم فنفس الطيارة بين ميلبورن واديلايد وبين اديلاد وبيرت وطبعا بين المغرب واستراليا ذهاب واياب. كيسكن معاهم فنفس لوطيل. خدمتو يحرض على وسائل اعلام بعينها. هادي الشي بلا ما نهدرو على اش قال علي "كود" هو عصابتو وكيفاش تصرف وكيفاش ولى شكام برگاگ لسعد واللي معاه. هاداك موضوع اخر