تضييق وشوهة للبلاد. شكون صادر حق نجوم مهرجان مراكش يهدرو على الحرب فغزة؟ كيفاش بلادنا سامحة بالاحتجاجات وكتعاقب الصحافيين وكتمنع النجوم يهدرو على موضوع آني عالمي

واش مهرجان مراكش للفيلم بدا كيوسع "لائحتو السوداء" للصحف والصحافيين اللي ممنوع عليهم يحصلو على اعتماد؟ هاد الشي اللي غاديين فيه. "لوديسك" الجريدة الالكترونية الصادرة باللغة الفرنسية خلصات الثمن على تناولها موضوع اي صحافي فالعالم كان خاصو يتناولو.
فخلال تغطيتها للدورة 20 من مهرجان مراكش الدولي للفيلم وللي تحيدات منو "الطابي روج" لسبب سياسي وهو الحرب فغزة بعد هجوم حماس الارهابي ضد اسرائيل يوم 7 اكتوبر واللي تقتل فيه 1200 اسرائيلي ف6 سوايع ثم تبعاتو حرب قتلات فيه اسرائيل اكثر من 13 الف غزاوي ثلثيهم من الاطفال والنساء فرد ارهابي حتى هو.
ثم تمنعو الندوات الصحافية للجنة التحكيم باش ما يكونش شي سؤال على هاد الموضوع؟ سولات "لوديسك" او دارت خدمتها الصحافية بعض النجوم فهاد الدورة على موضوع الساعة فالعالم كولو اي الحرب فغزة. فكان غير يتطرح السؤال كيف بان هاد الشي ففيديو٬ ويخرج شي حد من المكلفين بالعلاقات مع الصحافة٬ باش يمنع النجم او النجمة من الادلاء برأيو.
هادي اهانة اخرى فهاد المهرجان. مصادرة لحق النجوم فالتعبير. شفنا تقاسيم وجه النجمة الامريكية رئيسة لجنة التحكيم دجيسيكا شاستين بعد ما سولاتها "لوديسك" على الموضوع. بانت مستغربة من تصرف المكلفة بالصحافة واللي كتقول "اسف. هنا كنهدرو على السينما ماشي على شي حاجة اخرى". نفس النجمة كانت واضحة ففكرتها فكلمتها فحفل الافتتاح. يعني تمنعات تهدر.
الممثل الدنماركي المكرم فالمهرجان مادك مايكلس حتى هو رفض يهدر حقاش هدرو معاه قبل باش ما يعبرش على رأيو.
المهم ان محاولات "لوديسك" سالات بمنعهم كجريدة يديرو خدمتهم. ادارة المهرجان قررات ماشي غير ما تسمحش للجريدة تقرب من النجوم بل سمعنا احدى المكلفات كتهدر فاهانة للصحافي وللصحافيين "ماشي مشكل. غادي نعيط على علي عمار" اي ما تسوقوش هادا غير صحافي صغيور. غاديين كادارة نعيطو لمدير النشر ديال "لوديسك" علي عمار باش يعاقب الصحافي. شفتو فين وصلنا. يعاقبوه علاش؟ على سول سؤال صحافي اني. علي انو دار خدمتو؟
دابا هادا مهرجان مديور ببلاد فيها حرية. سامحة لتنطيم احتجاجات تقريبا يومية داعمة لفلسطين ولكن تجي مؤسسة المهرجان وتقرر ان حتى شي واحد ما يسول سؤال عندو علاقة بالحرب مع غزة.
دابا الصحافة تهانت من مؤسسة مهرجان مراكش. حتى النجوم المعروضين تعرضو للاهانة حقاش صادرو حقهم فالتعبير. فضيحة من فضايح هاد المهرجان اللي تخلق النهار الاول باش يكون فضاء للتعبير عن التعدد. فضاء للحرية. ماشي لتقييد الحرية