رسالة الملك حول مدونة الأخلاقيات شعلات البرلمان..ومصدر ل"گود": المتابعين فملفات تبديد المال العام والحشيش والتزوير غايتحيدو من المسؤوليات فمجلس النواب ويتمنعو من المشاركة فالوفود لي كتمشي برا المغرب

البرلمان بمجلسيه كيعيش حالة استنفار من نهار الأربعاء الماضي للي نظم فيه المجلسين احتفال بمرور 60 سنة من عمر المؤسسة التشريعية وللي تقرات فيه رسالة ملكية فيها تعليمات صارمة وواضحة للمجلسين بضرورة إقرار مدونة لأخلاقيات العمل البرلماني تكون ملزمة بالقانون.
الرسالة الملكية جات فالوقت للي كيتواجد فيه العديد من البرلمانيين أمام القضاء بتهم تتعلق بالفساد والتزوير وتبديد أموال عمومية وتجارة المخدرات والاتجار في البشر.
رئيس مجلس النواب رشيد الطالبي العلمي التقط الميساج للي جا في الرسالة الملكية واتاصل برؤساء الفرق البرلمانية وبلغهوم بضرورة تحمل مسؤولياتهم في إبعاد البرلمانيين المتابعين أمام القضاء عن أي مسؤوليات تمثيلية لفرقهم في أجهزة المجلس وأيضا في المهام الدبلوماسية خارج الوطن.
هاد الشي غادي يسرع المصادقة على تعديلات فالنظام الداخلي ديال المجلس، وكذلك يكون ميثاق اخلاقي فالبرلمان وللي بموجبه غادي يتم إبعاد المتابعين في قضايا فساد في تدبير المال العام وتجارة المخدرات والاتجار في البشر من المسؤوليات التمثيلية للمؤسسة التشريعية داخل وخارج الوطن. هذا الأمر معمول به فجميع البلدان الديمقراطية.
رئيس مجلس النواب، كما أكد مصدر فضل عدم ذكر الإسم ديالو، طلب أيضا من رؤساء الفرق تغيير بعض الوجوه من مهمات الدبلوماسية البرلمانية بسبب فضائح تورطات فيها وتدارت عليها تقارير من طرف المصالح الخاصة.
هاد الشي واقع فمجلس النواب، أما فمجلس المستشارين فرئيسو النعمة ميارة يبدو أنه ما مسوقش وممساليش لهاد الأمور حيت مشغول بزاف بالحفلات والندوات والعراسات وكيوجد راسو لتجديد رئاسة المجلس في أكتوبر المقبل.