نايضة فسان بيدرو قبل ماتش المغرب وزامبيا: المدينة ولات مغربية والمغاربة والايفواريين موحدين باش يشجعو الأسود وها الاجواء

كتعيش مدينة سانبيدرو الايفوارية اليوم الاربعاء، أجواء مغربية بإمتياز حيث المنتخب المغربي لاعب ضد منتخب زامبيا بالليل ضمن الجولة الثالثة والأخيرة من دور مجموعات كوب دافريك.
المغاربة عمرو مدينة سان بيدرو كلها، وكتحس براسك فحالة وسط مدينة مغربية، الجالية المغربية المقيمة فأبيدجان هما اللي مكلفين وعارضين على المغاربة اللي جايين من خارج الكوت ديفوار سوا من المغرب او من دول اخرى.
الايفواريين حتى هما خارجين للشارع وكيغوتو "ماروك ماروك" وباغيين يشجعو المنتخب المغربي اليوم ضد زامبيا، وحسب تصريحاتهم لموقع "گود"، فهما باغيين يشجعو المغرب حيث كيبغيو المغرب بزاف وكيحماقو على المغربة، وباش يتأهل المنتخب الايفواري حتى هو للويتيام دو فينال، حيث فوز الأسود على زامبيا غيخلي الايفواريين يتكاليفور كأحسن ثالثة.
اما بالنسبة للطقس فالجو حار بزاف هذا الصباح فسان بيدرو، والرطوبة طالعة بزاف ولكن المهم ان المنتخب المغربي غيلعب مع 8 الليل بتوقيت الكوت ديفوار، يعني ان الحرارة غتنزل نسبيا بالمقارة مع النهار اللي فيه اجواء حارة بزاف.