وليد الركراكي في الندوة الصحفية يفجر قنبلة ...!

" عندنا ماتش صعيب هذا نهائي بالنسبة لينا حيت طايحين مع منتخب تقصا و مابقاليه ما يخسر ، من أفضل المنتخبات فالغروب غايلعبو بلا ضغط وغايبغيو يخرجو بأفضل صورة. حتى حنا عندنا بزاف ما نربحو و بزاف ما نخسرو فهاد الماتش داكشي علاش غايكون ماتش صعيب بزاف "
" درنا قرار نجيبو العائلات بناء على تجربة 2018 باش داك جو العائلة لي عندنا برا نلقاوه حتى فالتيران ، حنا مركزين العائلات كانشوفوهوم بعد الماتشات . هادي مسؤوليتي أنا كانعرف إلا ربحتي تا واحد ما كايهضر و إلا خسرتي كولشي كايبدا ينتقد "
" النصيري العمل والتضحية لي كايدير كمهاجم كاين غير المدربين لي في المستوى العالي ومتابعي الكرة لي غايعرفو بالقيمة ديالو وشحال مهم في السيستيم ديالنا ، سفيان أمرابط تطور مستواه و داز لمستوى آخر ، أملاح كايلعب بألم في الركبة ديالو اليمنى و واخا هكاك كايضحي . هادو لعابة كايلعبو في أوروبا وكلما وصلو لمستويات كبيرة كلما استفاد منهم المنتخب "
" مزيان للكرة الإفريقية نشوفوها كاتيق في ولاد البلاد ، اللعابة السابقين كايعرفو أكثر من أي واحد آش محتاجة الفرقة . أنا فرحان لأليو سيسي حيت حتى هو فبلادو كلا العصا . الواحد ملي كايربح كولشي معاه وغير كايخسر أو كايدوز من أشهر مامزيانينش كاتبدا الهضرة "
" حنا عارفين شنو باغيين وعارفين علاش جينا ، مادام الحكم باقي ما صفر راه باقي ما درنا والو . عندنا بزاف د الاصابات كاين لعابة لي لعبو ضد بلجيكا وهوما ماشي 100% بدنيا ولكن 100% ذهنيا وباغيين يموتو معانا . الإصابات والتعب عند كولشي في كأس العالم .عارفين شنو تابعنا وخاص ندير مع السطاف أفضل الخيارات ولكن بالصح ماعندناش بزاف ديال الزهر من اللول راه ضيعنا تيسودالي و لوزا وحاريت وماسينا إضافة للاصابات لي عندنا دابا "
" حنا ديما كاندخلو باش نربحو وغانديرو غلط كبير لا بدلنا شي حاجة ، كندا باغية تدخل التاريخ و ماغاديش يخليونا نرتاحو . فرقة كاتجري بزاف وعندها بزاف د الشباب و المزايا . دابا المهم عندنا كولشي فيدينا ، كايهمنا شنو باغيين حنا ماشي شنو باغية كندا "
" بالنسبة للإصابات ، كيف درنا في ماتش بلجيكا غانخليو حتى للصباح ونحددو شكون يقدر يلعب . العيادة الطبية ديما عندنا عامرة و كولشي كايتقاتل باش يوجد و يلعب ، ماخاصش نديرو أخطاء وخاص نختارو لي قادر يعطي 100% "
" حنا جينا باش نتأهلوا ، لا مادخلناش التاريخ غدا غانكونو ضيعنا فرصة بين يدينا . خاص نبدلو العقلية د الخوف و "إلا طرات" راه إن شاء الله غانتأهلو "
" حنا مغاربة وأفارقة ، وبحال جميع المنتخبات الإفريقية باغيين نبينو أن الكرة الإفريقية تطورات وكانستاهلو مقاعد أكثر . كذلك حنا عرب و مسلمين ، والحمد لله بزاف من العالم العربي والاسلامي كايشجعونا ونتمناو نفرحوهوم "
" حنا غدا غانلعبو على الرباح و الرباح فقط ، ماغانساينوش آش غايوقع في الماتش الثاني و غانديرو الماكسيموم لي نقدرو نديرو باش ما ندموش . حنا محمسين و اللعابة باغيين يدخلو التاريخ . اللعب على التعادل غايكون خطأ كبير خاصة ضد منتخب كايجري بزاف وماعندو ما يخسر والمهمة ديالي و السطاف نفكرو غا في الإيجابي ونوضعو بين عينينا غا السيناريوهات المزيانة"
" حنا جينا باش نتأهلو للدور الثاني ، غانحترمو أي فرقة . نسينا دابا كرواتيا و بلجيكا و كانفكرو في كندا فقط "
" حنا عندنا بزاف ما نخسرو لا ماجبناش النتيجة غدا ، داكشي علاش غانعطيو كولشي "
" داكشي لي وقع في بلجيكا وهولندا مؤسف ، كايخص الواحد يحترم البلاد فين تولد وكايعيش و لكن كانظن هادوك ماكانوش مغاربة . المغاربة ملي كايربحو كايفرحو و كاينشطو "
" حنا ماكانفكروش في الخصم د الثمن . كانفكرو غا في كندا خاص نربحو و نتأهلو . كندا لاعبة بلا ضغط ديجا تقصاو واخا يربحو غايبقاو في الدار . حنا لي عندنا بزاف ما نخسرو غدا وخاص نبينوها فالتيران "
" اللعابة لي كايديرو المدرب ، كاين بزاف د المحتالين في كرة القدم مدربين كايبغيو يبينو أنهم سحرة و لكن في الحقيقة راه غير عندهوم لعابة مزيانين. أنا كانحاول نقدم شنو كانعرف ندير و الثقة فيا وفراسهوم . من بعد هوما لي كايديرو الخدمة ملي كايربحو راه كولشي مزيان و ملي ماكايربحوش ماعندك ما تدير . ضد بلجيكا كون خسرنا كانو نص المغاربة غايقتلوني حيت خرجت بوفال "
" بونو دابا أحسن ، كايبقى هو الحارس الأول و قائد في الفرقة وكايوجد لماتش غدا"
" السطاف كامل كايدير خدمة كبييرة ، حنا ماشي منتخب كايفكر في الإصابات ولا البطاقات الصفراء ولافكرنا فيهوم نقدرو نديرو أخطاء و ندموا . حنا راه من 86 ما تأهلنا للثمن هذا هو الهدف دابا وداكشي علاش عيطت لأفضل 26 لاعب لي يقدر يعاوني و لي غايدخل غايتقاتل . يمكن في المستقبل نبداو نفكرو كيفاش نجيريو الدور الأول و لكن دابا ماعندناش الحق نفكرو في هاد الحسابات . يمكن في 2026 إلا تأهلنا أما دابا راه كون ما تأهلناش في 2018 و دزنا من داك التجربة ماكناش غانعرفو كيفاش نربحو 4 نقاط في أول جوج ماتشات هاد العام "