شكون يثيق فالمنصوري صديقة گاع لي تشدو فملفات فساد مالي والمخدرات؟..بنت الباشا طلقات نداء "الشفافية والنزاهة والكفاءة" قبل ثلاثة ايام من مؤتمر البام ونسات بلي الوافد الجديد شتت احزاب واستقطب اعيان بحالها ودمر أحزاب وشرعن الرحل

كتبان يوم وتغبر شهر..هادي قصة واحد السياسية كيعجبها لي يوصفها بضمير حزب الاصالة والمعاصرة، هادي فاطمة الزهراء والمنصوري. بنت الباشا ديال مراكش هادي سنوات. للي كولشي عارف من جات وكيفاش طلعات وشكون نفخ فيها باش تولي "نسخة" جديدة وسط البام بحال الياس العماري اللي كان كيحكم فالعمال والولاة حسب تصريحات سياسيين.
اليوم بنت الباشا خرجات بنداء قبل ثلاثة ايام من المؤتمر، نداء ممكن دير به لايف حتى هي وتولي فحال المؤثرين لي ركبو على حملة الاعتقالات الاخيرة اللي طالت سياسيين ورجال اعمال ورؤساء اندية، فملفات فساد وتجارة الحشيش والتلاعب فالصفقات العمومية. المنصوري كيعجبها تركب على الموجة، واختصرت نداءها للمؤتمر الوطني الخامس فقيم النزاهة والشفافية والكفاءة..
اييه هاد السياسية لي هي صديق هاد الملايرية والسياسيين لي تشدو فملفات فحالة اعتقال مؤخرا، وعلى رأسهم سعيد الناصري، رئيس فريق الوداد ورئيس مجلس عمالة انفا فكازا، هذا صديقها ومقرب منها وكيدعمها وسط الحزب وعبد النبي بعيوي رئيس الجهة الشرقية اللي سبق عطى لجميع اعضاء مكتب سياسي سابق طونوبيلات "بي ام". هادا حتى هو معتقل من اصدقاء وداعمي بنت الباشا.
المنصوري يلا كانت كتهضر على النزاهة، تجاوب الرأي العام والشعب والدولة كيفاش كانوا معاك اللي تمت ادانتهم او متابعين فملفات كبيرة تجاوزت الحدود والقارة الافريقية (اسكوبار الصحراء).
كيفاش كنتي صديقة معهم، بحال صلاح ابو الغالي لي غبر من المشهد ومابقاش كيجي للبرلمان واللي كيتحرك باوامرك. بنت الباشا قالت :"هناك أوقات نكون أمام مسؤولية تاريخية ... والمؤتمر الخامس اليوم يعد لحظة من تلك اللحظات. أمام مشهد سياسي متشتت ... بفعل قضايا مالية وصدمات سياسية ... من حق المغربيات والمغاربة أن يطالبوا بشفافية أكثر ... بنزاهة أكثر ... وكفاءة أكثر.". المنصوري كتهضر على مشهد سياسي مشتت، غير نسات مذكراتش فهاد النداء الاسباب ديال هاد تشتيت، نسات بلي حزبها البام كان من الاسباب، فاش بدا ظهور البام بدات قصة انهيار الاحزاب الحقيقية شفنا كيفاش هاد الحزب رون السياسة فالبلاد وساهم فالترحال السياسي وزيد عليها الحروب لي دار باش استقطب الاعيان ويتحكم فالانتخابات..
هذا تاريخ يا بنت الباشا ميمكنش تمسحيه بنداء "ساذج". راه الشفافية المنصوري، هي تقولي للرأي العام فين مشات كثر من 4 ملايير من ميزانية الحزب، وعلاقة محمد الحموتي بها. مجاوبتوش على هادشي لي الصحافة الوطنية كتبات عليه. فين التخليق يا المنصوري. وجاء في نداءها :"أمام النداءات المتواصلة لصاحب الجلالة نصره الله، من أجل تخليق الحياة السياسية ... وجب أن تكون لنا الشجاعة لنحاسب أنفسنا ونعيد التفكير في تنظيماتنا الحزبية ... لنكون أكثر استعدادا لاستحقاقاتنا ومواعيدنا الديمقراطية، مضيفة :"قوة أي إطار حزبي في مشروعه الواضح والطموح والذي يجيب المغربيات والمغاربة عن تساؤلاتهم وانتظاراتهم اليومية، مشروع يجعل المغرب ينخرط في تنمية مستدامة ودائمة. الشفافية هي أن تكون لنا الجرأة لنقول، نريد أن نكون فوق كل الشبهات ولن يتحمل المسؤولية في صفوفنا إلا أناس بأخلاق عالية ومبادئ صادقة وقناعات صافية.". حزب الأصالة والمعاصرة هو حزب كل المغربيات والمغاربة الحالمين بغد أفضل ... فلنكن في مستوى هذا الحلم ... فنكن في مستوى هذه التطلعات... ولنجعل مؤتمرنا هذا مؤتمرا للتغيير ... مؤتمرا للتجديد ... ولنقل لجميع المغاربة حزب الأصالة هو حزب المستقبل، ومستقبلكم بين أياد جديرة بثقتكم. شفتو ديما كتوهم كلشي باللي كتهدر باسم جهة فالدولة وكدخل سيدنا.