وشفتو الدوخة اش كدير والله ما كيحشم. بنعدي كيقارن الهمة بماركون: علاش ما نجحاتش حركة لكل الديموقراطيين ونجحات حركة ماكرون ففرنسا

تدوينة غريبة ولا نقولو غيبة دارها حسن بنعدي القيادي في حزب الاصالة والمعاصرة كتب فيها "علاش فشلنا فحركة لكل الديموقراطيين بالمغرب وعلاش "اون مارش" =ديال ماكرون اللي ولى رئيس ففرنسا= نجحات "واخا كان عندنا =حركة لكل الديموقراطيين= نفس الاهداف من قبل". السيد قارن الهمة بماكرون.
هادا كيعني حاجة وحدة. ان هاد السياسي ما فهم والو. اولا ما كاينة مقارنة بين حركتكم وبين حركة ماكرون". اللي اسس حركتكم فؤاد عالي الهمة معروف فين كان ومنين جا وعلاش جا. ماركون مختلف عليه. ثانيا ماكرون ما دورش بيه سياسيين فاتهم الوقت. انت كنتي مع محجوب بن الصديق. واش ماكرون جاب شي حد من جيل الستينات وولى رئيس للحزب اللي خرج من الحركة بحالكم.
واخيرا دستورهم غير دستورنا. حركة لكل الديموقراطيين اللي دورات ليها الاعيان ووووو اقصى ما يمكن توصل ليه وصلاتو واخا بدون استحقاق. ربحات بعد ما ولات "البام" فالانتخابات البلدية ل2009 وانت عارف كيفاش ربحاتها وسيرات مدن ما كتستحقش تسيرها. وباش جا 2011 و20 فبراير الشعب كان ضدكم ضد مشروعكم. اش داك تقارن بين جوج لا مقارنة بيناتهم