ريافة اسياد البام. قيادي فالبام ل”كود”: كلشي اللي فالحزب مسرحية وحكيم هو الياس وبغاو ريافة يبقاو يتحكمو فكلشي وكلشي غادي يجي يصفق ويبارك الامين العام وسالات مدام وهاد الشي كولو كنقويو فالعدالة والتنمية

واش كاين بصاح شي مخطط لنسف المجلس الوطني الاستثنائي لحزب الاصالة والمعاصرة هاد العشية من تخطيط الياس العماري الامين العام لحد الان باش يقطع الطريق على حكيم بنشماس؟ قيادي ل”كود” اعتبر ان الامر غير مسرحية وصافي. المصدر اكد ل”كود” ان ما قيل عن ترشيح صلاح ابو الغالي للامانة العامة للحزب بدعم من الياس العماري كذوب فكذوب والسبب ان المعني بالامر ما كانش فراسو هاد الشي واطلع عليه فالصحافة.
القيادي اللي من الصحراء اكد ل”كود” ان “حكيم هو الياس” وان “الرباعة ديال “بنعزوز والعربي لمحارشي ومحمد الحموتي والياس العماري وحكيم بنشماس كيتلاقاو بشكل يومي” قيادي اخر من جهة بني ملال قال ل”كود” “ما تبقاوش تصدقو راه كاينة خلافات بين الريافة. راه غير كيتوزعو الادوار وهاد الشي من اللول. انا ما نصدقش ان الحموتي او بنشماس مضاربين مع الياس. واش بعقلكم كتصدقو هاد الشي”.
المصدر اكد ل”كود” “هاد الشي دار لاسباب كثيرة منها تحييد امثال فاطمة الزهراء المنصوري وغيرها. اللي فكر فيه فكر فحاجة اخرى يقضي على مشروع الحزب اللي فيه دعم للمرأة وللشباب. هاد الحلم اللي باعوه للمغاربة طلع كذوب. ريافة بغاو يبقاو متحكمين فهاد الحزب”
المصدر قال ل”كود” “شوفو شخصية حكيم بنشماس وغاديين تعرفو كلشي. ياك المنصوري البارح طالباتو باش يجاوب على الاغتناء غير المشروع فالمكتب السياسي وتقلق واليوم خرجات تعلن دعمها ليه. راه بنشماس من غير هاد الاغتناء عندو مشاكل كثيرة كتخلي الياس العماري هو اللي غادي يسير كلشي”
ثم ان هاد البامي “ساد على راسو” “ما كيتكلم مع حد” “كلشي عارفين كيفاش نجح فيعقوب المنصور باش وصل لمجلس المستشارين وربح الرئاسة” راه تخطيط ديال الياس من الفه حتى يائه.
ريافة ما كيبغيوهمش ريافة
المصدر نفسه قال ل”كود” ان بنشماس عندو مشكلة كبيرة هو انو ما كيقدر يواجه الناس ما قادرش يخطب فيهم. ” دابا غير قولو لي باعتباره رئيسا لمجلس المستشارين واش عمرو دار شي لقاء مع ناس الحراك باش كانت شاعلة. ياك هو والياس العماري غبرو. فين كان الحموتي فين كان بنعزوز علاش ما داروش وساطة وخلاو الحراك فمواجهة الملكية”
قيادي من الحزب اكد ل”كود” باللي هاد المسرحية كلها رابحة منها “العدالة والتنمية”. شخصية بحال بنشماس دعم كبير للبي جي دي. واحد ما يقدرش حتى يحل مشاكلو الخاصة وكان معول على الياس العماري كيفاش يحل مشاكل المواطنين
“حنا غاديين نمشيو نصفقو على اللي اختاروه وصافي. اما الحزب ومشروعو اللي جينا على قبالو راه ولى من التاريخ” يختم قيادي الحزب ل “كود”