فاش كتدير معرض ديال الصناعة التقليدية النحاس او الجلد مثلا في مدينة لي معروفة بهاد الصناعة فراه كتقتل الصانع والتاجر عوض تروج ليهم راه عوض الزبون يهبط للمدينة ويتسارى ويستهلك ويروج كتنوض تعرض ليه حدا دارو بمعرض

فاش كتدير معرض ديال الصناعة التقليدية النحاس او الجلد مثلا في مدينة لي معروفة بهاد الصناعة فراه كتقتل الصانع والتاجر عوض تروج ليهم، راه لا يعقل أن التاجر او الصانع خاص غير يفوت الصور دالمدينة باش يبيع سلعتو، بينما هو كيعاني الازمة العام كامل، وعوض تخلي الزبون يهبط للمدينة ويروجها ويدور فيها، ويستهلك ويكلس ياكل ويشري حاجات خريين ماشي غبر داكشي لي هابط عاى ودو، كتنوض نتا تحبس الزبون حدا دارو وتجيب ليه معرض لي مكيروج حتى حاجة حداه ، والادهى من هذا كتجيب معرض ديال نفس المنتوج لي كيتباع في المدينة طول العام ولي معروفة بيه أصلا، عوض يعرضو صناع المدينة وتجارها معروضاتهم في مدن أخرى بعيدة لي التنافسية فيها قليلة وغير معروفة بدوك المنتوجات ماشي العكس.
في فاس لي معروفة بصناعة النحاس والجلد ديما كيتدارو معارض ديال المنتوجات الجلدية والنحاسية، وهادشي لي كيسبب في موت التجارة في المدينة القديمة، كذلك آخر مرة مشيت لتينغير لقيت فيها معرض ديال المنتجات المجالية، التمر والعسل وآملو ومنتوجات التعاونيات الفلاحية ديال المنطقة، داكشي كان زوين وواعر وتقديت من عندهم، مثلا انا تقديت الثمر ديال الريصاني لي قريبة لتينغير و خل التفاح ديال ايملشيل ومنتوجات أخرى ديال المنطقة، وداكشي حتى بلا معرض كندخل للسوق دالمدينة كنلقاه ديما العام كامل تقريبا، منطقيا معرض بحال هاداك خاص يدار في فاس او طنجة او الرباط او كازا يجيو الناس ديال الجنوب الشرقي ويعرضو منتجاتهم في مدن كبيرة وبعيدة عليهم ماشي يعرضوها في باب الدار ويبقاو معولين على البراني يكون دايز، على كاين شي ولد تينغير غادي يشري الثمر من المعرض وهو العام كامل حداه.
في طنجة لقيت معرض في الصيف ديال الطواجن والشاشيات والمنادل وباقي المنتجات لي معروف بيهم الشمال عموما رلي كيتباعو طول العام في سيدي بوعبيد، أييه هاد المعارض واعرين ومهمين وخاص يدارو بكثرة ولكن راه خاص يتنظموا في مدن بعيدة على فين تصاوب المنتوج المعروض، ومن الاحسن أن المنتجات المجالية ديال التعاونيات الفلاحية الصغرى في المناطق النائية يمشيو يعرضو سلعتهم في المدن الكبرى المروجة بحال طنجة الرباط كازا قنيطرة مراكش تطوان، راه هذا هو المنطق ديال التجارة ماشي تعاونية في ايملشيل ديال خل التفاح كتعرضو في تينغير تحت الجبل وصافي، والصراحة تقديتو من عندهم الجودة والثمن المناسب ولكن للأسف ماغاديش نلقاهم في المدن الكبرى، هاد العبث في كل حاجة والاسيير العشوائي ديال غرف التجارة والصناعة وبنادم قديم لي كيسيرهم خاثوا يسالي، ويجيو شباب كيعرفو لثثمين المنتجات وتسويقها داخل المغرب وخارجه ماشي لي كيعرفو للمرقة ويبقاو شادين الكرسي قرن وزمارة.