الركراكي: ها علاش اللاعبين المغاربة كيتألقو فأوروبا وفلافريك لا.. عندنا مشكل فكوب دافريك وهادي حقيقة.. أرسن فينگر قاليا غيتبدلو عليك ووصلت على كلامو

فسر الناخب الوطني وليد الركراكي علاش لاعبين المنتخب المغربي ما تألقوش فكوب دافركي مع ليكيب ناسيونال وملي رجعو حيحو مع الفرق ديالهم.
وهضر الناخب الوطني وقال فحوار مع قناة الرياضية: "ما تقدرش تقارن بين نادي وليكيب ناسيونال، المنتخب كيبقى منتخب ستايل آخر ولعب آخر وكورة اخرى وكيتجمهو 15 يوم او سيمانة قبل البطولة، وفالنادي حاجة اخرى، اللعب ديال اوروبا ماشي هو ديال لافريك، واللاعبين راه كانوا متألقين قبل ما يجيو للمنتخب وكانو كيلعبو، مزيان ملي رجعو دابا تألقو باش يكونو مزيانين فشهر 3".
وكمل الركراكي: "بقى فينا الحال على الجمهور، وكاين اللي سافر حتى الكوت ديفوار وكل واحد وفاش مشى وحتى حنا مكرهناش، والدراري تقاتلو وكان ممكن نديرو احسن واللاعبين مشاو باش يديرو شي حاجة كبيرة وكانو باغين، وخاصنا نتقبلو هدا الشي، ملي كتربح الناس كيشجعوك، وملي كتخسر الناس كيتقلقو وهادي هي الكورة والحياة، وما خاصكش ماي تبقى فرحان ملي يفرحو وما تخدمش وما خاصكش تقلق منهم حيث تقلقو عليك".
وزاد الركراكي: "أنا تقبلت الانتقادات وديما كنتقبلها، فلاكوب ديموند ما كنتش احسن مدرب فالعالم، وفلاكوب دافريك ما تقدرش تعرف راسك فين، والحمد لله أنا ملي جيت للمغرب والشعب مساندني ومشجعني ولد البلاد وفرحانين بك زيد خدم.. ارسن فينگر قاليا اللي تابعك صعيب وخاصك توجد لهاد الشي وقلت له راني عارف، وقاليا إذا ما ديتيش كوب دافريك غتشوف بزاف ديال الحوايج غيتبدلو وغيدورو، مزيان الكلام ديال فينگر شفتو بعينيا. وكنتقبل هاد الشي كيف قاليا هادي هي خدمة المدرب وخاصك تقبلها وراني كنتقبلها، وخاصني نزيد نخدم".
واكد الركراكي ان المنتخب المغربي عندو مشكل فكوب دافريك وتأكد مرة اخرى فالنسخة الأخيرة فالكوت ديفوار، وكشف انه غتكون دراسة باش يلقاو حلول لهاد المشكل ويتغلبو عليه.
وقال: "الحقيقة هي هادي كوب دافريك من 1976 ما ديناهاش، وماي كتشوف نيجيريا فأخر 20 كان دارو 15 دومي فينال يعني هادي واحد الفرقة اللي كتعرف تلعب هاد البطولة، حنا مازال عندنا مشاكل دوزنا اجيال كبار وحتى هما ما قدروش يربحو هاد لاكوب دافريك وما قدروش حتى يدوزو للدور الثاني".
وكمل الناخب الوطني: "دابا ومع رئيس الجامعة غنديرو تحليل وبحث باش نعرفو فين كاين المشكل ديالنا فكوب دافريك واش بدني ولا رياضي واش مونطال واش ما قادرينش على الجو واش البروفايل ديال اللاعب واش من المدرب، حيث وبصراحة دازو مدربين ربحو كوب دافريك مع منتخبات اخرى وما قدروش يربحوها مع المغرب ودارو إنجازات وما قدروش مع المغرب فكوب دافريك، وها أنا درت دومي فينال فكوب ديموند وما قدرتش نربح كوب دافريك، وهذا المشكل خاصو تحليل ودراسة مع ديبروفيسيونيل باش نخدمو عليها وفالمستقبل القريب او البعيد المغرب يكون بحال نيجيريا ومصر والكاميرون اللي كيعرفو يربحو كوب دافريك".