الركراكي: ما نادمش على شي لعاب ما عيطتش عليه للمونديال

أكد الناخب الوطني وليد الركراكي أنه لا يشعر بالندم تجاه أي لاعب ما عيطش له باش يشارك مع المنتخب الوطني المغربي فكأس العالم قطر 2022، وشدد على أن تجربة الأسود فالمونظيال خاصها تدرس باش يتعرف فين كان الخلل اللي جعل ليكيب ناسيونال تخسر دومي فينال وهادشي الهدف منو هو المنتخب المغربي يربح ألقاب فالمستقبل.
وتحدث وليد الركراكي فحوار مع قناة "الرياضية" وقال: "ما ندمتش على الاختيارات ديالى قبل كأس العالم وانا راضي عليها وحتى حد ما كان كيحلم نلعبو دومي فينال ضد فرنسا، وما كاين حتى شي لعاب غادي يربحنا الماتش وما ديناهش، كان عندنا كروب قوي باللاعبين اللي كيساندو وواخا ما كيلعبوش وباللاعبين اللي كانوا كيدخلو يلعبو غير 5 الدقائق وكيمنحو الإضافة".
وكمل وليد الركراكي وقال: "المهم هو خاصنا نديرو واحد الملخص لهاد المشاركة فكأس العالم وعلاش ما قدرناش نمشيو الفينال وشنو التفاصيل الصغيرة اللي خلينا فالطريقة باش نمشيو للمسابقة المقبلة سوا كوب دافريك أو كوب ديموند فالمستقبل ملي نتاهلو له ما نخليوش هاد التفاصيل يتسببو فالخسارة ديالنا، وغادي نديرو احتماع انا والطاقم التقني والجامعة باش ندرسو المشاركة ديالنا والهدف ديالنا هو نزيدو القدام باش فالمستقبل نقدرو نربحو ألقاب".