المغرب راه جنة ضريبية بالنسبة للمقاولين والشركات وصحاب المهن الحرة وجحيم ضريبي بالنسبة للموظفين ولي كتقطع ليهم الضريبة من المصدر.. أغلب فلوس المغاربة كاينة خارج البنوك وكيتداولوها المواطنين بيناتهم خارج الاقتصاد نوعا ما

المغرب راه جنة ضريبية بالنسبة للمقاولين والشركات وصحاب المهن الحرة، وجحيم ضريبي بالنسبة للموظفين ولي كتقطع ليهم الضريبة من المصدر، أغلب فلوس المغاربة كاينة خارج البنوك وكيتداولها المواطنين بينهم خارج الاقتصاد نوعا ما، عمليات البيع والشرا في النوار جاري بيها العمل، وفاش كتلقى شي مقاول كيديكلاري كولشي كتلقاه كاتبها كبيرة كأنها ميزة وماشي حاجة عادية وداكشي لي خاصو يكون، وحتى الشاري متقبل هاد الفكرة وكيتعامل بيها وبالنسبة ليه الدولة غاشمة ضالمة وأي درهم خلصو ليها في الضريبة ماغاد يستافد منو الشعب والو، وغاد ياكلوه غير أشباه البوصيري والفايق وآخرون.
دولة الناتج الداخلي الخام ديالها مافايتش ثروات شخصية ديال أغنياء في دول أخرى وفي نفس الوقت أغلب النقد فيها كيدور برا النظام، البطاقة البنكية ماصالحة لوالو فقط تخلص بيها عند المتاجر الكبرى أما المعاملات اليومية فين ماتذكر لخلاص بلاكارط مكتلقاهش وخاصك تبدى تدور تقلب على كيشي تيري وترجع تخلص، لاكارط فقط كتخرج الفلوس من البنكة وتمشي تخلص بيهم كاش باش يغبرو عند الناس ومايبقاوش يرجعو للبنكة، الطبيب مكيتخلصش بيها الفارمسيان ديما خاسرة، الفحص التقني للسيارات معندهمش أصلا، كذلك صحاب البياس ديال الطوموبيلات راه شركات كبيرة كيتعاملو بالملايير بلا ماتعرف الدولة والو في آخر العام يديكلاريو باش بغاو.
بينما الموظف واخا هو براسو خاصو لي يتضامن معاه كتلقاه كيخلص ضريبة على التضامن وضرائب كثيرة مثقلة ليه ظهرو واخا يكون متقاعد. هاد الدولة الاجتماعية لي باغي يدير المغرب ولي بدى فيها كيفاش باغيها تكون بلا عدالة ضريبية بلا مايعرف الاقتصاد شنو فيه وشحال كتدور فيه خارج النظام، كيفاش يمكن يتغلب النظام على هاد الموشكيل راه ساهلة، بحال لي دارت الهند لي كان نصف اقتصادها غير مهيكل بدلات الوراق ديال الفلوس لي كيتعاملو بيها الناس، وهادشي لي خاص في المغرب يتجمعوا الفلوس قدام ويخرجوا فلوس جداد، باش تعرف الدولة بنادم شنو مخبي تحتو هاد المشروع داروه الهنود لمليار ونص ديال البشر واقتصاد كيتحسب بالترليون ماشي المليار، عوض الوضع الحالي بنادم مخلي الفلوس تحتو وفين ما كانت شي مبادرة ديال الدولة تلقاه مستافد هو اللول، عندو الرميد شد ألف درهم أيام كورونا شاد المساعدات القفة، حوالا بالعرام وهًو ماخاصو حتى خير.