كل عام كاينوض الصداع على موازين و كولا عام كانسمع بنادم محيح فالواقع و الفايسبوك و تويتر ” وا كون فلوس موازين بناو بيهم السبيطارات ! و المدارس” ! وا ” كون فلوس موازين بناو بيهم الديور للفوقارا” و كاتلقا بعرور جالس فالقهوة و صبعو الكبير خارج من الصاندالة فيه كيلو ديال الشومبينو و كايخاصم ” كون دوك الفلوس ديال موازين فرقوهم على الفوقاراا و الناس لي كاينعسو فالزنقة كون واااهلي فين وصلنا ؟ ” فين غانوصلو آ بعرور فين ؟ واش عمرك ضربتي طليلة على الميزانية ديال موازين و شفتيها مناش كاتكون و لا غير كاتبعبع كي الحولي ؟ وا فيق من الگلبة و دير لراسك شي ميزاجور و قبل ماتبدا تعربط خاصك تعرف بلي ميزانية موازين اليوم ماكاتساهمش فيها الدولة گاع ! ! بتاتا ! و بلي نتا ماخاسر والو من جيبك هادشي لاكنتي من دافعي الضرائب و ماكنتيش تانتا من المتبربصين لي ماكايخلصو تا خرية للدولة و كايحلو زكهم ! ميزانية موازين كاتجي من السبونسورين ديال الشركات الخاصة بنسبة ثلاتين فلميا و سبعين فلميا تقريبا لي باقا كاتجي من مداخيل مختلفة ( فيها المداخيل ديال بيع التيكيتات و الكارطات، فيها المداخيل ديال المساحات الاشهارية، فيها دوك حقوق البث لي كاتشريهم التلفزة و حوايج اخرين…) اليوم موازين عندو موديل اقتصادي مستقل و قائم بذاته كايصرف على راسو براسو و كايقدر حتى يعطيك نتا المزلوط و نتي المزلوطة الامكانية انك تشوف و تسنط لنجوم عالميين فابور بلا ماتخلص تا ريال لابغيتي. يعني داكشي علاش كاتغوت ! ماكاينش ! باح ! مابقاش من الفين و طناش ! اذن علاش غادي تكرع ليا فري انا بواك واك حبسو موازين و بنيو السبيطارات. آش جاب السبيطارات دابا لموازين ؟ راه مايمكنش تلوح تصويرة شمكارة ناعسين فوق الكارطون فشارع محمد الخامس ولا تصويرة مرا مليوحة فميريزگو و تقوليا ” هؤلاء أولى بالأموال التي تضيع بموازين” شنو زعما بغيتي الشركات الخاصة ديال الاتصالات و البنوك يهزو فلوس السبونسورين و يبداو يدورو بيهم على المتشردين ديال المغرب ؟ هاك نتا سطاشرميا ديالك شريها سيلسيون ! هاكي نتي الف ريال لي جاتك شريها ماحيا ! هاك نتا هاد ربعميا مضي بيها المضا ! هاكي نتي باش تقداي سمطة د النورداز ! منين كاتجيبو هاد المنطق بغيت غير نفهم !؟ كيفاش بغيتو الدولة و لا الشركات الخاصة يبنيو الديور للفوقارا و يكسيوهم و يسبطوهم واش شوية لاباس ؟ حنا اصلا بنادم مقودة عليه و عايش فدولة مقودة عليها و كايشوف بعينيه لي غاياكلهم الدود كيفاش كايمشي للسبيطار و كايخليوه يتبردا فالباب و كيفاش كايمشي للمدرسة و كايلقا ثمانين فالقسم و المستقبل قدامو ظلااااام ! مجهووول ! والو ! كايعيش اليوم كي الكلب و يفيق غدا باش يعيش كي الكلب و هاكاك مقصح وجهو واخا هاك تمارا الكحلة كولها كايعيشها كايولد جوج و ثلاتة و ستة ! و مآمن بلي ” كولا كايتزاد برزقو” ! سميرة نسيفطها تخدم فالديور ! مراد نعطيه لحماد مول المحلبة ! نعيمة غاتمشي لطانطان عند ختها الكبيرة تعاونها …هادشي لامافرقهمش على الفوروجات و الروبانات ديال كازا يضربو الشيفون و البزاطم و تا بنادم. واش هادو لمن باغين الدولة تبني الديور ؟ اهاه علاش لا ! و شي منتزه سياحي بلابيسين و لما لا كايطل على البحر ، و تفرق عليهم تا البونات ديال ليصانص ! و درهم درهم د الجيكس للدار باش فاش يبغيو لوليدات يلعبو شعالة يلقاو باش … آ نوضاه من القوالب ! و نزيدك محاربة الفقر ماكادارش بالبنيان الديور للفوقارا و الصدقة و تفراق الفلوس و التدويرة و ضبر عليا نضبر عليك ! راه الدولة هادي آ سيموحمد ماشي الخيرية د عين السبع ! محاربة الفقر كاتكون بالبحث على استثمارات و خلق فرص شغل باش كولا ينش على كبالتو. و داكشي ديال اصلاح التعليم و الصحة و بنيان السبيطارات ماغايجيش بمنع موازين و لا غيرو ! داكشي غايجي بإرادة سياسية حقيقية و استراتيجية واضحة المعالم ماشي بالتهدريز ! و بميزانيات كبيرة لي تتوفر لهاد القطاعات باش يتصلحو و الميزانية ماكاتجيش من عند الشركات الخاصة حيت الشركات الخاصة كاتخلص ضريبة للدولة سميتها ضريبة الشركات و ضرائب اخرى الله يجعل البركة. الهضرة كاتبان ساهلة ” خاصنا نزيدو الصاليرات للمعلمين و خاصنا نشريو الداجينا و الدوا الحمر للسويسي ! و خاصنا جوج سكانيرات فميريزگو و خمسة ديال ليريم فمولاي عبد الله ” ايه و لكن باش ؟ باش عوالين يدار هادشي ؟ محاربة الفقر و الهشاشة و اصلاح التعليم و الصحة ماعندهم علاقة بالمهرجانات ! و بلا مايقولبوكم الخوانجية بداك التبربيص ديالهم حيت كايحاولو يخبيو الكره ديالهم للمهرجانات و الفن بصفة عامة لي كايسميوهم فالابجديات ديالهم ” فقس و فجور” و باش يدوزو ليكم القالب كايغطيوه بواحد الكوش ديال ” اه حقا اموال دافعي الضرائب ! اه حقا اموال الشعب” ! ” لك الله يا وطني” و يلوحو التصاور ديال شي متشرد فالزنقة و حداه تصويرة شاكيرا ! الفلوس لي كايتخسرو فموازين فلوس شركات خاصة ! ماشي سوقها هي فالسبيطارات و المدارس ! شركات خاصة كاتختار انها ترعى المهرجان باش دير لراسها الاشهار و تبان و يشوفوها الناس، يعني كاتلوح الفلوس باش دخل الفلوس ! السبيطارات و المدارس مسؤولية الدولة. هادشي علاش قبل ماتغوت ! خاص تعرفها بعدا باش منفوخة
