النظام الاوربي للانذار السريع للاغذية لغى تواجد كورونا فشحنة مغربية من لفريز. اجيو تشوفو شحال من فيروس او باكتيريا كيلقاوها الاوربيين فالصادرات الصبليونية اللي دايرين حرب على فلاحتنا

نهار 14 مارس اللي حنا فيه٬ خرجات شحنة من صادرات مغربية من لفريز براءة. فللول اعلن النظام الاوربي للانذار السريع للاغدية باللي هاد الشحنة ديال لفريز فيها فيروس "كورونا". مول لفريز طلب يعاودو التحليل حقاش بحال اي فلاح تايق ففلاحتو. تعاودات التحليلة على لفريز المغربي وطلعات سلبية. ما كاين لا كورونا ولا غيرها من الڤيروسات. نفس الشيء اللي كان وقع مع فريز شركة اخرى مغربية اتهمت باللي فيها "ايپاتيت أ" وفاللخر دارت لونسا تحاليل على الما وعلى الحقل وكلشي طلع هو هاداك. لا ايباتيت ولا غيرو.
هاد الانذارات بتواجد شي فيروس او شي مبيدات محظورة او شي زئبق فالحوت بكميات فايتة اللي مسموح ياكلها الانسان٬ ديما كتلقى. ماشي من صادرات مغربية. اللا. داخل الاتحاد الاوربي.
اللي كيضرب الصادرات المغربية ديما هما الفلاحة الصبيليون٬ ولكن ايلي جينا نقراو غير جريدة وحدة عندهم وهي "20 مينوتوس" فهاد ليام ونبداو من 14 مارس اللي حنا فيه٬ غادي نشوفو باللي على الاقل جوج مرات فالسيمانا كيخرج النظام الاوربي للانذار السريع للاغدية انذارات وتحذيرات.
يوم 14 مارس علن النظام الاوربي للانذار السريع للاغدية باللي بوسيف او الاسبادو الكونجولي ديال الصبليون واللي كيدور فالسوق الاوربية فيه نسبة فايتة لقياس من الزئبق.
غير للاخبار. راه ايلى مرا حاملة كلات هاد الاسبادو بهاد النسبة اللي لقاوها فالحوت الصبليوني غادي يجري فالدم. من بعد يوصل للجهاز العصبي وحتى الدماغ ديالو ويؤثر عليهم بزاف بزاف. يعني خطير وخطير.
نفس الجريدة صدرات نهار بعد ما خرجات لخبار علي الحوت٬ باللي المانيا كتشفات تواجد باكتيريا السالمونيلا بنسبة عالية فالفواكه الجافة اللي جاية من الصبليون. يعني اي الماني كلا لويزات او كريكعات او الزبيب غتولي فيه الدياري وتجيه السخانة ويرد بزاف.
وغير البارح خرج خبار اخر فنفس الجورنال الصبليوني "20 مينوتوس" باللي النظام الاوربي للانذار السريع للاغدية لقى فشحنة ديال الكرعة الصبليونية نسبة فايت المسموح بيها ديال المبيدات.
هاد الامثلة علاش؟ باش تشوفو انو باش النظام الاوربي للانذار السريع للاغدية يلقى شي حاجة فصادرات صبليونية صحف قليلة بل وحدة او جوج اللي كتهدر على الموضوع٬ وباش يلقاو انذار كيهم صادرات مغربية كتولي قضية رأي عام. اذن كلشي باين