بودريقة ما فهمتش باللي جراو عليه من "امانة" مجلس النواب. دار توضيح كيقول باللي ما حيدونيش وانا ما ترشحتش. راه الحزب اللي كيختار ودابا راك فالتوش

محمد بودريقة رئيس مقاطعة الفدا فكازا ونائب برلماني لنفس الدائرة عن حزب الاحرار وعندو مسؤولية اخرى وهي رئاسة الرجاء البيضاوي٬ ناض دار تدوينة فصفحتو كيوضح قبل ساعات بخصوص اعادة انتخاب مكتب اعضاء مجلس النواب.
بورديقة كان فالمكتب اللي انتهت ولايتو امين المجلس. فلائحة حزب الاحرار اللي نشرناها ف"كود" البارح٬ هاد البوسط خداه مبارك حمية من لحمامة.
صاحبنا كتب "يتم انتخاب أعضاء مكتب مجلس النواب جدد للفترة التانية من الولاية التشريعية 2021/2025 الذين أتمنى لهم التوفيق و النجاح في معاهم" وزاد "أي بعد انتهاء الفترة الأولى أي سنتي و نصف التي كنت قد تشرفت كأمين المجلس للفترة السابقة و عكس ما يتداوله بعض الأصدقاء من اقالة أو ما شابه التي لا طالما حلم بها البعض"
وسالاها "أنا لم أترشح أصلا للفترة التانية نظرا لظروفي الصحية و أكدتها لرئيس الحزب هاتفيا".
بغى يقول راه ما حيدنيش الحزب. طبعا حيدك الحزب وطيرك ولاحك. لائحة الاحرار فيها محمد غيات وزينة ادخلي نواب لرئيس مجلس النواب ورئاسة الفريق خداها محمد شوكي ولجنة المالية خداها لحسن السعدي ولجنة الخارجية خداتها سلنى بنعزيز.
اللي فهاد اللائحة ان الاحرار خلى تقريبا نفس الوجوه اللي كانت فالسابق غير تغيرات مهامهم. اللي طار هو بودريقة وبوعيدة نادية. بجوجهم طارو سياسيا. طيرهم الحزب. بوعيدة فشلات فلجنة الخارجية وبورديقة تحيد ماشي على مرضو ولكن على اللي كيروج عليه ولحد الان فشل يوضحو وضوح تام. مازال خارج المغرب. هو كيقول بسباب عملية على القلب دارها والهدرة كثرات على قضايا كتهم البيزنس ديالو. بودريقة طاشرون وعندو مشاريع لكن عندو مشاكل كثيرة. الامر عادي فالبيزنس ولكن باش تكثر الهدرة ومول البيزنس ساكت وطول خارج المغرب القضية كتاخد تفسير اخر
المهم ان الاحرار طير بودريقة لو كان بغاه كان يعطيه منصب اخر كيف دار مع لخراين. ياك كيقول هو باللي ما كاين والو وعلاش مازال خارج لبلاد. يدخل اولا عاد يقدر يتقبل منو ديك التوضيحات اللي كيكتبهم فصفحتو. اه نقطة اخيرة. باش دير توضيح ومعاه صورتك باش كنتي امين مجلس النواب راها كتفسر كلشي. كتأكد باللي طار وباقي فيه الحال وسياسيا تعرى.