الراپ كيدخل للبنيقة. كيفاش اغنية توصل جوج راپورات للحبس وسلفي هدد بحرب اهلية وامام كفر الاحزاب ما هدر معاه حد

ابتدائية فاس صدرات حكم اقل ما يتقال عليه "قاسي" فحق جوج رواپا يالله بداو. دارو اغنية "شر كبي اتاي" حيحات وحققات مشاهدات كثيرة. بلى ما نهدرو على مستواها دابا٬ نركزو على الحكم اللي صدر ضد هاد الجوج رواپا ففاس. 4 سنين حبس نافذ مقسومة عليهم بالتساوي. جوج لهادا وجوج لاخر. المحكمة قالت باللي الاغنية تضمنات عبارات كتحرض على التغرير بقاصرات.
تصورو المحكمة عندها بحال الاغنية بحال الواقع اليومي. ما فرقاتش باللي هاداك ابداع. ايلى كان ضعيف ماشي المحكمة اللي تحاكمو. كاين اهل الاختصاص. كاين النقد وكاين الذوق. لكلام راه ماشي تحريض كيف كيفهموه والا نشدو عدد من المبدعين والمبدعات. ايلى شي تشكيلي رسم وحدة او واحد عريان خاصو يتابع قضائيا. ايلى شي روائي جاب شي شخصية متمردة على الدين وقيم المجتمع حتى هو يتابع. ايلى شي سينمائي دار فيلم على موضوع كيهم استغلال الاطفال جنسيا وجاب شخصية مستغلة للطفولة تجي هاد المحكمة وتابعو....
هادا راه ما يمكنش يكون فهاد العصر. الحبس يوصل ل4 سنين لهادو ضربة للبلاد ماشي غير للمعنيين.
مقابل هاد التشدد لكبير ضد اصحاب الاغنية كان تقريبا خوف من تهديدات السلفيين قبل ما توصل المذكرة الخاصة لمراجعة مدونة الاسرة لسيدنا باعتبارو رئيس الدولة وامير المؤمنين. شفنا مول الفوقية هدد بحرب اهلية. هاد الشي قالو مباشرة ماشي فاغنية. شفنا اش دار الكتاني شيخهم فالتطرف. شفنا امام تابع للاوقاف كيفاش كفر كاع الاحزاب وسب وهاجم وكفر المتنورين فالبلاد. ما تحركاتش النيابة العامة. ما دارت اللي دار ضد هاد الرواپا.
واحد كيشكل خطر كبير على سلامة فئة من لمغاربة ما تفتح حتى شي حاجة ضدو و2 فنانة غناو اغنية قسمو عليهخم 4 سنين حبس.
أصدرت غرفة الجنح التلبسية بالمحكمة الابتدائية بمدينة فاس، زوال اليوم الإثنين، حكمها في حق صاحبي أغنية "شر كبي أتاي" التي أثارت مؤخرا ضجة واسعة على مواقع التواصل الاجتماعي.
وقررت الغرفة المذكورة، حسب مصادر "كود"، مؤاخذة المتهمين من أجل ما نسب إليهما، ومعاقبة كل واحد منهما بالحبس النافذ لمدة سنتين اثنين، بعدما اقتنعت المحكمة بأن الأغنية تضمنت عبارات تحرض على التغرير بقاصرات.