اش واقع فبلادنا كيفاش ولينا عايشين محاكم الاخلاق؟ شدات دراري علي اغنية "شر كبي اتاي" وفتحات تحقيق فتفلية دارتها بنت مع دراري. هاد المتابعات المضحكة ضرب لحرية التعبير وما يمكنش تصادرو حرية هاد الجيل بهاد الاسلوب

فعشريام فهاد الشهر وقعو 2 احداث عادية تعاملات معاها الدولة غير القضاء بطريقة غير عادية. الاول وقع لخميس 4 ابريل 2024 بفاس. وكيل الملك فابتدائية فاس حط مول اغنية "شر كبي اتاي" فالحراسة النظرية. التهمة ان هاديك الاغنية تحريضية على التغرير بقاصرات. بسباب كلمات كتقول لقاصر "دوري عندي مويطير نحيلة". جمعيات كتقول لراسها مدافعة عن الطفولة قال ليك دارت شكاية. نفس الجمعيات للي شفنا شوهتها فقضية "دانييل" للي اغتاصب كثر من 13 طفل نواحي لقنيطرة وخرج بعفو ملكي. وبقية الفيلم راكم عارفينها. المهم هاد الجمعيات ما هدرو على موضوع اغتصاب دانييل للاطفال قبل محاكمتو ولا باش تحاكم ولا نهار خدا عفو.
جمعية ممكن تقبل منها تبغي تقاضي ولكن كيفاش وكيل الملك لدى ابتدائية فاس تتحرك وضد اغنية. كيفاش تعتابر اغنية محرضة علي الفساد ففاس مدينة اشتهر فيها الملحون وانواع موسيقية اخرى فجزء منها اباحي وكيتغناو بيه. كيفاش فهاد القرن تابع واحد على اغنية؟ راه اللي كيحكم عليها ماشي القاضي ولكن النقد والجمهور. ممكن تكون نقاشات كبيرة ولكن ماشي تشدو الدري الصغير.
حتى فهاد القضية كاين الكيل بمكيالين. ايلى كنتي رابور معروف ممكن تمارس حريتك كيف بغيتي. نجوميتك تحميك. وايلى كنتي يالله بادي وكتبتي اغنية اعتاقدو حراس معبد الاخلاق بللي ماشي صالحة٬ يتابعوك.
من المفروض خاص يكون الاصل فالمجال الفني هو الحرية. ماشي التضييق. ماشي الحكم وفق الاخلاق. وكيف قلنا٫ راه ثراتنا الغني ولكبير من لعيوط والملحون والانواع الموسيقية الاخرى فيها جزء كيهدر بحرية على الجنس والجسد. كيهدر على اللي باغيين يحاكموه حراس معبد الاخلاق اليوم.
نفس الحراس اللي ناضو لفيديو قصارة فيه بنت كتختار من عدد من الشباب واحد. هو مصايب بوسائل بسيطة. بغاو يديرو بحال برنامج مشهور فالعالم تنتج فعدد كبير من الدول. ناضو صحاب الاخلاق كيهدرو. وجدو باش تحرك الدولة. تقنية غبية ومعروفة. هاد الشي للي كاين. دخلات الفرقة الوطنية للشرطة القضائية. قاليك الفيديو لقصارة فيه عناصر تأسيسية لجرائم يعاقب عليها القانون. رجعنا للاحكام الاخلاقية اللي كتغلف بالقانون
طبعا جيل جديد بحال هادا لا ديال الدراري ديال فاس ولا ديال البنت للي طلعات تزادت برا وعايشة برا وما عندها علاقة اصلا بالمغرب من غير اصلها٬ هاد الجيل فايت هاد حراس المعبد. فايت هاد الناس اللي فالدولة ضارباهم التلفة وتابعين شباب ما حرض على القتل ما دعا للكراهية. حاول يبدع فينا. نجح ولا فشل هاديك قضية اخرى. المهم الاغنية راها ابداع وديك محاكاة البرنامج راها كتدخل فديڤيرتيسمون.
هاد الشباب غادي يحافظ على حريتو. على حرية تعبيرو. على ابداع امور كتشبه ليه. دوك اللي هاجمو البرنامج بتبريرات متخلفة وسبوه وقالو باللي ماشي هادي حرية التعبير غير كيخربقو.
حرية التعبير ما يمكنش يحددها وحدين اصلا ما عمرهم أمنو بيها ولا دافعو على قضايا كتهمها فبلادنا. كون قالت الجمعية المغربية لحقوق الانسان مثلا٬ باللي هاد الشي ماشي حرية التعبير٬ كان ممكن على الاقل تحتارم موقفها واخا تكون ضدو٬ حقاش هادي جمعية كدافع على حرية التعبير وكتخوض معارك دائمة فهاد الميدان٬ اما دوك المحافظين المتخلفين اللي كيداعيو باللي هما حداثيين وفاول قضية كيتفرشو٬ فما يستاحقو لا احترام ولا تقدير. هادوك اخطر على المجتمع من دوك المحافظين السلفيين اللي كيدافعو على افكارهم بلا عنف بلا ارهاب.
حرية التعبير كل لا يتجزأ. من حق كل واحد يعبر ويبدع. كاين شرط واحد: هو ما يكونش تحريض على القتل والتصفية والكراهية