واش غا تشعل فالبام بين قدماء اليسار وصحاب اللعاقة والأعيان والمتابعين فالقضاء؟ القيادة الثلاثية فأول امتحان حقيقي بعد المؤتمر الأخير وبنت الباشا شادة لعصا من لوسط وتالفا

حزب الأصالة والمعاصرة كيستعد يدوز مرحلة صعيبة من حياتو بعد المؤتمر الوطني الخامس للي تعقد فبداية فبراير الماضي وأفرز قيادة ثلاثية على رأسها فاطمة الزهراء المنصوري (المعروفة إعلاميا ببنت الباشا)، وفيها أيضآ، من جهة، محمد مهدي بنسعيد للي موراه تيار قدماء اليسار وبعض الحقوقيين والمثقفين، ومن جهة أخرى، صلاح الدين أبو الغالي، المقاول ورجل الأعمال للي موراه تيار الأعيان وصحاب اللعاقة ورجال الأعمال والمصالح.
أول مشكل غادية تواجهو الأمينة العامة الفعلية ديال البام بنت الباشا هي تشكيلة المكتب السياسي للي غا تقترح على دورة المجلس الوطني للي غادية تعقد فمدينة سلا يوم 11 ماي الجاري.
بعد 3 أشهر على المؤتمر، ما قدراتش القيادة الثلاثية تحسم لائحة أسماء المرشحين للمكتب السياسي، وهذا دليل على الصعوبة للي كتواجهها فاطمة الزهراء المنصوري باش توفق بين تيار قدماء اليسار وتيار الأعيان ورجال الأعمال.
فهاد يومين، القيادة الثلاثية غا تعقد اجتماع حاسم باش تنهي تشكيلة المرشحين للمكتب السياسي للي غا تقدمها لأول دورة للمجلس الوطني للي كترأسو قلوب فيطاح.
الأخبار المسربة من داخل البام كتقول بللي التشكيلة ديال أعضاء المكتب السياسي غادية تمنع على كل من له شبهة متابعة أمام القضاء في ما يتعلق بقضايا الفساد وسوء تدبير الشأن العام وأيضا قضايا انتهاك حقوق الإنسان وخاصة قضايا التحرش الجنسي وغيرها من القضايا المشابهة.
فهاد الإطار، بزاف ديال الأعيان ورجال الأعمال والمنتخبين داخل البام ماعجبهومش الحال. علاش أصلا جايين لحزب الأصالة والمعاصرة، راه أغلبهم كيديرو السياسة حيت باغين "الحصانة والامتياز القضائي"، كيقول متتبع للشأن الحزبي.
هاد الأعيان ورجال الأعمال للي عندهوم ملفات رائجة فالمحاكم، راه إلى سدات عليهم بنت الباشا الباب ديال المكتب السياسي يعني غدا غادين يمشيو لأحزاب أخرى للي غادية ترحب بيهم. هنا كاينة مشكلة ثانية كتواجه القيادة الثلاثية.
هاد المشكلة الثانية هي للي غادية تطرح للحسم فدورة المجلس الوطني ديال البام نهار السبت الجاي، وهي الوثيقة ديال "الأخلاقيات والسلوك" داخل حزب الأصالة والمعاصرة.
فمشروع الوثيقة للي أعدته لجنة خاصة أغلبهم من الحقوقيين وقدماء اليساريين والمثقفين ديال الحزب، تدارت بزاف ديال الأمور صعيبة باش يقبلوها تيار الأعيان ورجال الأعمال. هادو كيدعمو الحزب باللعاقة وشبكات العلاقات المصلحية المباشرة للي عندهم مع المواطنين، وهادو هوما للي غادين يجيبو الأصوات باش إلى بغا الحزب يتصدر نتائج الانتخابات ف 2026 ويترأس الحكومة. وهادو إلى حرمتيهم من الترشيح للبرلمان بمجلسيه، ومجالس الجهات والجماعات والغرف، آش غادين يكلسو يديرو فالبام ولا فالسياسة كاع.
إذن الطرح غادي يسخن مزيان بين تيار الأعيان بزعامة أبو الغالي، وتيار قدماء اليسار بزعامة بنسعيد، والمنسقة ديال القيادة الثلاثية فاطمة الزهراء المنصوري غادية تحاول تحافظ على التوازن داخل الحزب بين القوتين وتحاول تشد لعصا من الوسط.
وباين بللي الدورة الأولى للمجلس الوطني للي غا تعقد نهار السبت الجاي غادية تكون حاسمة فمسار ديال حزب الأصالة والمعاصرة للي الهدف الأول ديالو هو يطيح حزب التجمع الوطني للأحرار ويفوز بانتخابات 2026.
واش بنت الباشا قادة على هاد الرهان ولا ماقاداش.. المتابعين للشأن السياسي غايشوفو.