الجزولي عمدة مراكش السابق في حوار مع "كود" : مالي ومال الماجيدي أنا ما كنعرفوش وما غاديش ندعيه وهاد السيد كنحتارمو وكنوقرو

هل بالفعل قررتم مقاضاة محمد منير الماجيدي بسبب شركته "اطلس ميديا" للوحات الإشهارية بمراكش؟
أش بيني وبين الماجيدي وشكون اللي كال ليكم غادي ندعيه واش دار لي.
غادي دعيه حاش شركتو "اطلس ميديا" للوحات الإشهارية ما خلصاتش 28 مليون خذاتها ضو من المدينة وما خلصهاش؟
ايلى كانت دعوة غاديا تكون للشركة ماشي للماجيدي، زايدون أنا ما عارفش واش هادي الشركة ديال السي الماجيدي ولا اللا
واش كتهدر بصاح واش ما عارفش باللي الشركة ديال الماجيدي؟
هاد الهدرة كتكولوها انتوما الصحافيين أنا ما كنعرف غير "اطلس ميديا" وما عارفهاش ديالمن.
دابا واش غادي تدعي الشركة ولا اللا؟
نتسناو حكم الاستئناف بعدا وهاد الشركة رآه كنتسالوها غير 28 مليون ويلى خلصاتها ما كاين مشكل
وزايدون علاش كتهدرو على هاد المبلغ ونسيتو مليار ومائة مليون اللي ما خديتهاش وخداوها الموظفين
انت اللي سلمتيها ليهم؟
أنا سلمتها غير لعشرة موظفين و64 موظف كانوا خداوها فعهد الرئيس السابق.
غادي ندعي الموظفين كلهم ايلى ايد الحكم الاستئنافي الحكم الابتدائي.
حاجة اخرى قضية شركة اطلس ميديا كان مكلف بها أبدوح اللي كان قبل مني اما أنا فباش شفت الشركة كتخلص 600 درهما خليتها تخلص 3500 درهما
مرة اخرى رآه الماجيدي ما عندو علاقة وانا ما جبدتوش. هاد السيد كتحترامو ونوقرو حقاش مدير الكتابة الخاصة لجلالة الملك