حلقات " كريمة و بوجمعة" حصريا على " كَود" الحلقة 11: " ...اش من طريق؟ "

الضبع ورث من بّاه فلوكة كان كايدور بها الناس و التوريس ف بورقراق،كان كايخدم بها شوية فالاول و من بعد طلعات ليه فالراس وخلاها لواحد ولد عمو،برهوش من هادوك اللي كايديرو حسانة مخربقة و يلبس مزيان و يهز معاه جنوية و يقول على راسو شفار و واعر.

شي مرات كنلقاه فبرتوش الضبع مع صاحبتو،صحاباتو، كل مرة مع وحدة فشكل،غير كنجلسو كايبقا يهضر معنا بحال الا مشارك معنا الستونات وبحال الا دوز معنا الحبس، شي مرات كايعيق،كايبغي يبين بحال الا كايتحكم فينا.
لقيتو اليوم معمر البرتوش وانا بغيت غير نشرب طالع لي الدم،مكنبغي نشرب قدام كريمة حيث قطعات الشراب..فرع ليا راسي بتصويرة مصورها وهو كايسلم مع العامل لابس فيها جابادورة قهوية حيث فرقو على مالين الفلايك شي اوراق جداد ثاني هادشي شي اربع شهور.

الدرية كاتشيش وهو لابس غير شورت ومعري على صدرو اللي باينة غير كايحسنو باش يبان فيه الشعر كثير و فيه ضربة صغيرة تلقاه غير هو اللي دارها لراسو.
ملي يعيا من العياقة ولا تمشي الدرية كايبقا يزاوكَ فيا "امتا نخرج معك ا الروداني نشاركو معك الطريق؟"
- اش من طريق؟ تا سير ديها ف الفلوكة ديالك.

---

دزت عند موحا الخضار،عندو كاراج كايبيع فيه ملي كترشق ليا كنمشي عندو نشرب ف الداخل.موحا كان معنا انا و الضبع ف شي خرجات،وف ايامات الانتخابات مع الحاج،تا واحد النهار مرض.لقاو عندو ثقبة فالرية ودوز شحال فالسبيطار مدخلين ليه تيو فصدرو.خرج برية وحدة اللي بقات خدامة و قطع الكارو و الشراب و كلشي.وهو يتلم مع موالين اللحايا،دارو ليه كروسة كايبيع فيها شي تخربيقات قدام الجوامع وتزوج عند واحد منهم وهو اللي دار ليه هاد الكاراج.
ملي دارو ليه العرس بقا فينا الحال،دخلونا واحد البيت وخلاونا بوحدنا مجموعين بلا مزيكا بلا نشاط وهما ف السطاح كايغنيو فيه شي اناشيد.

وخا تعلم يهضر بحالهم وكايلبس فوقية و وخا طلق لحية مزال كمارتو كتخلع العيالات، تاوحدة فالدرب مكتزعم تقضا عندو.كايبقا يشوف فهاديك ماطيشة اللي عندو حتى كتخناز.مع الوقت ولا المحل كايصفر مافيه غير الميزان وهو يرجع عند الضبع شد عندو شي بركة وبدا يبيع ف الزطلة.ومن ديك الساعة غبر المقدم اللي كان ديما عاصر عليه لايكون من صحاب الارهاب.
شربت عندو فالكاراج،بقيت كندور ف الكواسط اللي عندو والو غير ديال موالين اللحايا،تفكرت بلي كان عزيز عليه الشاب بلال،بقيت كنشرب وكنسمعو كايسربي الكليان ديالو :كيجي شي حد يبقا يقلب ف بطاطا تما نص ساعة و يربح معه عشرة د ريال فالكيلو ولا قل.من بعدو يجي واحد اخر فجوج سيكَوند يحط خمسين درهم فطريّف.كايربح معه عشرين ولا ثلاثين درهم دقة وحدة.ويقول ليه "جزاك الله خيرا".
كايبقا يطل عليا ويقول ليا :"وامتا توب ا الروداني و ترجع للطريق؟"
- اش من طريق؟ تا سير ديها ف لقزبور ديالك.

بوجمعة.