حصري. اب التلميذة راوية التي قال لها الوفا سيري تزوجي ل"كود": بنتي تعقدات وما يمكنش ترجع للقراية بلا اعتذار الوزير قدام زملاءها

- اعلاش مابقاتش راوية كتمشي للمدرسة ؟
- في الحقيقة راوية تعقدت من المدرسة، بسبب داكشي اللي گال ليها الوزير محمد الوفا المحترم، واصبح جميع تلاميذ المؤسسة تي گولوليها قلبي ليك اعلى راجل.

- أش كتقول راوية في الكلام ديال الوزير محمد الوفا ؟
- هي خافت من الوزير ماعرفاتش واش كيضحك ولاكيهضر بالمعقول، والبارح جاو عندي مجموعة ديال الاساتذة ومدير المدرسة باش ترجع راوية للقراية، ولكن مابغاتش.

- كيفاش كانت النتائج ديال راوية العام الماضي ؟
- شوف راوية كتمشي 3 كلم يوميا للمدرسة، والحقيبة المدرسية كيتعدى الثقل ديالها اكثر من 8 كلغ، باش تقرا، اما النتائج ديالها فهي جيدة جداً وهدشي بشهادة المدير والأساتذة ديالها، خصوصا وان والدتها هي المسؤولة عن عملية تتبع مسارها الدراسي، ولكن أش بغيتي تدير هذ الشي اللي أعطى الله.

- أش كتسناو دابا من الوزير؟
- كنتسناو ان محمد الوفا يقدم اعتذار ديالوا امام زملاء راوية بالمدرسة، حتى يخفف من أزمتها النفسية.
وقد اعلنت عدة جمعيات تمثل المجتمع المدني عن استيائهم، من التصرف المتهور لوزير يعتبر وزير التربية والتعليم، بل ان بعض الفاعلين الجمعويين بمراكش، يعتزمون مقاضاة محمد الوفا خصوصا بعدما تأكد خبر اعتزام الطفلة "راوية" ترك مقعدها في المدرسة، والجلوس بجانب والدتها بالبيت، في الوقت الذي تحارب فيه وزارة الوفا الهدر المدرسي. كما تستنكر جمعية آباء وأولياء تلاميذ مؤسسة العزوزية التي كانت تتابع فيها راوية دراستها، اللامبالاة والتجاهل الذي عرفته قضية الطفلة راوية من لدن مسؤولي وزارة التربية الوطنية بمدينة مراكش.