علاش مايتزادش شي حزب سميتو "حزب النكارين" يتجمعو فيه كاع هادوك لي كايعصرو فالقهاوي و يعطيوها للكريتيك؟‎

—
كاين واحد النوع د الناس حاقدين، فميريكان كايسميوهم the haters يعني الناس لي ديما كارهين الوضعية و شنو مادرتي معاهم عمرهم يكونو فرحانين و كايقولو عليهم haters gonna hate ! يعني بالعربية تاعرابت " الكارهين ديما غايبقاو كارهين "هاد الناس غادين و كايكترو فالمجتمع ! عزيز عليهم المنغصات… المشكلة انهم كايعيشو من هاد الحقد و الكراهية و الكريتيك هوما لي عاطينهم معنى لحياتهم! لاماكانش هادشي غايموتو و هاد الناس فيهم صحفيين و كتاب مناضلين و حتا بنادم مسالي قبو من داك النوع لي كايشد نورمال فالقهوة و كايعمر الكلمات المتقاطعة و كايحط قدامو باكية د ماركيز و يبقا النهار و ماطال و هو كايسب فالدولة لي مادارتش ليه و فالناس لي مهيمجين و فالقانون و فالعيالات و فمول القهوة… هاد النوع هو لي طلعو عليه النكتة ديال "ختانة هادي"…


علاش جبدنا الهضرة عليهم ليوم؟ حيت فوقما كاتقرب شي مناسبة فالمغرب و لا شي مشروع ضخم و لا شي مهرجان كاتلقاه هو اللول "بن عكسون" شاد العكس و ماعاجبوش الحال ! طبعا اللازمة الشهيرة لي كايقولها و يعاودها هي " وااا دوك الفلوس راه زايدين فينا " "آش خاصك ا العريان موازين ا مولاي" " بقا لينا غا الاكواريوم فكازا … " " بقا لينا غا تي جي في فالرباط" …فحال لا هوا معطيا ليه الوكالة باش يهضر باسم الشعب و لا كايصحاب راسو سبارطاكيس محرر العبيد !


اولا شكون نتا و شكون تكون ؟ على رأي الشاعر الكبير كمال العبدي ، ايلا نتا ماباغيش الاكواريوم فكازا راه بزاف د الناس باغينو و باغين يديو ولادهم ليه ، و لا نتا ماباغيش الموروكومول راه بزاف د الناس كايمشيو ليه و فالويكاند ماتلقاش فين تقلز فيه دبانة ! لا نتا ضارك خاطرك من جيهة موازين راه امة لا اله الا الله كاتحج ليه كولا عام و كاتشري التيكيتات باس تحظر للحفلة د فلان و لا الحفلة د فرتلان ! و دوك الناس لي كايمشيو للموروكومول و دوك الناس لي بغاو الاكواريوم و دوك الناس لي بغاو يتفرجو فمهرجان فاس للموسيقى الروحية و لا فطانجاز راه تاهوما كايخلصو الضرائب و تاهوما مساهمين و يمكن كثر منك فاقتصاد البلاد ! و ا ا ا بعرور كولا يديها فك** و يدخل سوق راسو …

ماشي واحد حازق باغي يفرض الحزقة ديالو على الباشار ، ماشي حيت نتا فقير معدم غادي تفرض على الناس مايخرجو مايدرجو من ديورهم مايمشيو لبلايص نقيين ماينشطو ما يسهرو … مالنا على حالتنا؟ راه المغرب ماشي هوا نتا بوحدك و دواركم و لا حومتكم ! المغرب راه عايشين فيه بزاف د الناس من بزاف د الخلفيات و التوجهات و المستويات … ماشي حيت نتا حازق الدولة كاملة خاصها تكون حازقة ! و بلا ماتهضر بسميت الشعب حيت الشعب راه هوا لي كايخرج يتفرج فالسهرة د الستاتي فموازين و الشعب هوا لي كايمشي يطلق رجليه فموروكومول و الشعب هوا لي غدا غايقطع ورقة باش يدخل يتفرج فالروكان و الروطال ف الاكواريوم … ايوا هنيونا من النكير الخاوي.

هاد النوع طبعا مول قهوة نورمال و باكية تماركيز و لا مالبورو كونطربوند الحقود الكاره ! طبعا ماعندوش ادنى فكرة على الدور د هاد النوع من الاستثمارات او المهرجانات، هو بغا الناس يبقاو سادين على راسهم و عايشين فالقهرة و الزمط باش يبقى بوقملة على خاطرو …عيش ا العياشي راه اخرتها قبر ! وخليو بنادم و الشباب ينشطو شوية و يفرحو حتا هوما و يعيشو علاش حيت مغربي زعما مامنحقوش تاهوا يتفرج فشي سبيكطاكل ؟ واش بنادم لاماخرجش و شطح و غنا و هوا عندو 20 عام فوقاش غايديرها ؟الشعب من حقو يرفه على راسو باش مايطرطقش! كولا وقت و قتو ا الاخوان و كولا وقت و ناسها ! وماشي ضروري الشعب يكون تعيس و كاره و حقود باش نتسماو شعب واع بالاولويات … راه بنادم كايجيبها غير فراسو …

انا كانقتارح على هاد الناس عوض مايبقاو يضيعو وقتهم فالقهاوي و التجمعات و القر الخاوي يأسسو حزب يسميوه "حزب النكايرين" الشعار ديالو كاس د قهوة كحلة و كارو ماركيز, يديرو يد فيد، و يترشحو تاهوما للانتخابات، و يدخلو تاهوما لعالم السياسة و لي قال العصيدة باردة يدير يديه فيها…