هادي نضحكو بها يوم العيد. عامل المحمدية الشكاف شفرو ليه بلغتو فالمصلى. ها شكون ما خلاهش يرجع حفيان للدار

علمت "كود" ان عامل اقليم المحمدية علي سالم الشكاف قد تعرض للسرقة صباح يومه السبت اثناء ادائه لصلاة العيد بمصلى لاكولين بالعالية. العامل اللي كان مع الكاتب العام للعمالة ورئيس المجلس العلمي والمندوب الاقليمي للاوقاف وعمدة المحمدية ورئيس مجلس عمالتها ورجال الامن والدرك٬ صلى وسالى بغى يلبس بلغتو٫ يحكي مصدر ل"كود" عاين الحادث٬ ما لقاهاش. "العامل اللي من اولاد دليم داو ليه بالبلغة" يضيف مصدر "كود".
العامل تلف اواه كيفاش يتعرض للسرقة وشكون غادي يشفرو. حسب مصدر "كود" فان العامل عاد الى بيته ببلغة اخرى "واحد السيد فالدرك هو اللي عطاه بلغة واش ديالو لا جابها ما عرفناش. المهم ما خلاهش يمشي حفيان" يتحدث مصدر "كود".
اللي زوين فهاد الشي ان الامام كان كيهدر فخطبة العيد على السلم والامان فهاد لبلاد وما كانش عارف باللي اللي مكلف بهاد الشي غادي يتشرف بعد دقائق