المغرب والصحراء وايكيا والسويد: العبث الأكبر هو فيناهوما صحراوا من هادشي. شباط يدافع على دخول زليليك للمجال الحضاري آش بينو وبين شي سويد وتخاف غي يديروك يما شي رياضيين ويتحولو للاجيئين سوريين

الصحراء من توابث الأمة المغربية( ربما ماشي كولشي)، المهم بزز من الواحد هي من توابث الأمة، ولن نتنازل قيد أنملة على أي ذرة رمل من رمالها، إلى غير ذلك من الجمل الرنانة لي كبرونا بيها، لكن فالواقع الديبلوماسية المغربية لي من المفروض أن المغرب كياخد صراع سلمي عبر المفاوضات وتحكيم الأمم المتحدة حول صحرائه، واخا هو كتجي شوية غريبة تتفاوض مع جوج كياطن من أجل شي حاجة ديالك، ولكن هانية عين ماشافت قلب ماوجع، فالواقع الديبلوماسية المغربية وبعض القرارات المفرطة فالوطنية الصادرة عن بعض المسؤولين، كتخلي الواحد مايصدقش هاد النوع من الأخبار كاع، بقوة كيجيك الأمر جد عبثي.
فمثلا طغى هاد اليوماين خبر توقيف شركة إيكيا وكاين لي قال بدعوى أنها سويدية وبحكم أن السويد البرد والملل مالقاو مايدار باش يفرغوا على تأنيب الضمير الأوروبي لي كياكلهم بغاو يعتارفو بجمهورية الصحراء الغربية، واخا الخبر الصراحة ممأكدش منو وجاني غريب، إلى أنه غير مستبعد خصوصا الى كانت المبادرة فردية من قبل شي حد، بحال لي وقع مع أميناتو حيدر لي عمرنا سمعناها حتى فجأة ولات حقوقية مشهورة عالميا، ومناضلة توجت بجوائز فالمحافل العالمية لدفاعها المستميت على حقوق لينسان فالصحراء، لحد الآن الخبر أغرب من أن يستوعبه العقل ومعامن مع إيكيا، طبعا بحكم أن المتجر ديالها راه تقاد فراه غادي يحل لأن القضية فيها شلا موكة وفيها شركة هولاندية كبيرة عالميا، ومولاها واحد من أثرى رجال العالم، يعني راه غي شي لعيبة تما وغادي يفتح لمحال وينافس ماحالات خرى ويغزو السوق المغربية كيما دار فالعالم.
أما إلى كان الأمر بصح فراه الصراحة أغبى قرار يمكن تخاد فتاريخ الديبلوماسية المغربية، أولا الشركة حاليا تعتبر هولاندية، ومولاها هو لي سويدي ورغم أنه من أغنى شخصيات العالم فراه الساط معروف عليه أنه كيعيش بحال شي معلم ، بنفس الطوموبيل فولفو لي شرا تلاتين عام هادي، الأتاث ديالو من المحل عندو ومركبو هو، وكيعاودو عليه شي لعيبات ديال التقشف فالعيش مقارنة بالقرة لي كيملك ، فراه من العبث تهدد بحال هادا تسدليه المحل بسبب مشكل ديبلوماسي مع بلادو، لي أصلا ماعايش فيها عايش فسويسرا وغي تزاد فيها أما أصلو ألماني، ببساطة لامنطقية فالتصرف نهائيا لدرجة واخا يكون بصح مايقدرش عقل عاقل يستوعبوا.
وملي قرر المغرب يسيفط ممثلين عليه للسويد يحلو الموشكيل مسيفط وفد من بينهم من قاموا بأكبر المشاكل فأحزابهم وفالمغرب فالسنوات الأخيرة لدرجة ردو الساحة السياسية فالمغرب موشكيل كبير،لشكر ماتسيفطوش حتى للعزو، الى فتيليه الطهارة ديال شي جاركم فراك غي تعديتي على راسك ماحساك تسيفطوا يمثل المغرب ديبلوماسيا فقضية من أهم القضايا الوطنية، أما خونا شباط من التجمعات الخطابية فالرشيدية وكشف العلاقات الغرامية بين الوزراء ، لمناقشة السويديين فالقرار لي باغين يتاخدوه بشأن الصحرا، والعبث الأكبر هو فيناهوما صحراوا من هادشي ، شباط حدو يدافع على دخول زليليك للمجال الحضاري آش بينو وبين شي سويد، تخاف غي يديروك يما شي رياضيين مغاربة غي كيوصلوا تم ويحركوا، أو يتحولوا للاجيئين سوريين.