— من بعد ما عرفت شكون هوما واليديا وشكون خوتي قالت لي الواليدة أن الله كاين والقرآن كتاب الله ومحمد رسوله، وقبل مانبدى نفرق بين الخير والشر ،الخطأ والصواب( من منظور الواليدة) لقنوني أن الصحراء مغربية، وأنا الجزائر باغا تاخدها لينا حيث فيها البيترول، من بعد ماتلقنت هاد المعلومات عاد بديت كنتعلم كيفاش ناكل بأدب(باقي مكنعرفش)، كيفاش نقطع الشانطي و تعلمت بزاف ديال الحاجات واجبة يتعلمها الواحد باش يعيش، ولكن قبل منها عرفت أن الصحراء مغربية، ويجب عندم التشكيك في ذلك، يمكن تشكك فوجود الله ولكن متشككش فمغربية الصحراء. ملي كبرت عرفت أن الواليدة كانت غالطة مسكينة(بالنسبة ليا) فشلى حاجات، عطيت لراسي فرصة باش نقلب ونبحث حتى توصلت لهاد القناعة، كفرت ببزاف ديال الحاجات تلقنتهم و أنا صغير، ولكن عمري قدرت نشكك أو نكفر بمغربية الصحراء، الله الى درتي معاه العيان راه كيعاقب لهيه لفوق ومن بعد حياة عامرة بالزهو والنشاط، ولكن المخزن الى درتي معاه العيان كيعاقب هنا، والمخزن هو لي قالينا الصحرا مغربية، وطبعا ماعلينا غي نصدقو الأمر. ملي كانو كيقريونا على الدولة الموحدية والمرابطية، كان كيقولينا الأستاذ، موريتانيا كانت ديالنا ومالي حتى هي والجزائر والتونس وحتى ليبيا واسبانيا حتى هي ديالنا، ولكن مقاليناش كيفاش حتى وللاو ديالنا، وكيفاش حتى مابقاوش ديالنا، وشكون حنا أصلا، علاش زعمة حنا لي مكناش ديالهم مثلا، واش فموريطانيا مثلا مكيقريوهمش أن المغرب كان ديالهم، الصراحة دوك الدروس كانوا كيخليونا نفتاخرو بكونا مغاربة، دولة عظيمة أو كانت عظيمة، والصراحة راه زينة تنتمي لدولة عظيمة، أو على الأقل دوزات العظمة، ونتاصرات فمعركة الزلاقة وواد المخازن، دولة كبيرة، أو كانت كبيرة، لذا فمن الطبيعي أننا كمغاربة نتشبتو بالصحراء، على الأقل غي باش تبقى بلادنا كبيرة ونفتاخرو بأننا بلاد كبيرة ومناخها متنوع وتضاريسها غنية، والشواطئها مديدة. ولكن مؤخرا بدا كيدخلي الشك، ملي الصحرا ديالنا، علاش كنتفاوضو على ودها، ومعامن كنتفاوضو، وعلاش منوضين هاد الجقلة كاملة ياك هي ديالنا، كاين شي واحد كيتفاوض على شي حاجة ديالو. الإستفتاء لي دارتو النكليز مع اسكتلندا، ولي صوتوا الأغلبية بالبقاء مع النكليز، علما أن الإسكتلنديين راه فصراع منذ قرون مع النكليز، وحتى كان قريب يحررهم ميل كيبسون ففيلم بريفهارث، صوتوا للبقاء مع النكليز حيث دولة واعرة، ديمقراطية واقتصاد قوي، وكذلك جبل طارق فضل البقاء مع النكليز على أنه ينضم للسبليون، كذلك نحن راه كون كنا دولة نيت نيت عظيمة كيما قراونا فمكنضنش أن شي طرف منا غادي يبغي ينفصل العكس راه يخيروه من الإنفصال والبقاء فراه غادي يبقى، لكن للأسف حنا دولة عظيمة فالمقررات الدراسية فقط.
