ها اللي كلنا. البوليساريو جعرات باش تأكدات من زيارة محمد السادس للعيون. راسلو حتى بان كي مون وقدموا معطيات خاطئة باش يقنعوه يدخل

كما كان متوقعا صحاب البوليساريو جعرو بزاف بعد سماعهم خبر زيارة الملك محمد السادس الى مدينة العيون وباقي المدن الصحراوية. فقد بعث زعيم البوليساريو محمد عبد العزيز رسالة الى الامين العام الاممي يومه الاثنين ثاني نونبر قال انها "احتجاجا على الزيارة" الملكية.
علاش غادي يحتج السي عبد العزيز؟ احتج طبعا باش شاف الاستعداد غير المسبوق لهذا الزيارة وانخراط سكان المدن الصحراوية في ادعاد الظروف لاستقبال تاريخي لملكهم.
عبد العزيز كيكول فرسالتو ان السلطات المغربية "كثفت الحصار الخانق على المواطنين الصحراويين" منذ شهر. طبعا اللي كيزور العيون وكيعرف الانفصاليين قبل الوحدويين غادي يعرف باللي هاد الشي كذوب وحتى الامم المتحدة من خلال المينورسو ومنظماتها عارفة هاد الشي كذوب. السي عبد العزيز ضرو بزاف باللي حتى بعض الانفصاليين خدامين كيوجدو للزيارة ومدورين الناعورة حقاش خداو مشاريع لتبليط واجهات الاحياء وتنقيتها. س
زعيم البوليساريو كيقول باللي "الزيارة مرفوضة من طرف الشعب الصحراوي" وانها عمل استفزازي. شكون كالها ليك. اولا الشعب الصحراوي ما عمرو صوت عليك تكون ممثلو في المقابل هنا فمدن الصحراء كاينة انتخابات ديموقراطية بشهادة منظمات دولية واختارو هاد الناس ممثليهم وكانت نسبة المشاركة في اخر انتخابات =الانتخابات البلدية لرابع شتنبر 2014= قياسية علي الصعيد الوطني. دابا فالبوليساريو خايفين غير من الاستقبال الكبير اللي غادين يديروه المواطنين فمدن الصحراء للملك. اللي كيقرا الصحف وكيشوف اليوتوب والفايس عارف باللي الزيارة غادية تكون تاريخية وباللي صحراوا غادين يخرجو يستقبلو الملك بلا ما يكولها ليهم حد. هادا فحد ذاته رد على البوليساريو وعلى اسطورة الممثل الشرعي للشعب الصحراوي". راه الممثل الشرعي ليهم هما منتخبيهم ماشي انتوما
طبعا هاد الرسالة جات بعد ما شافت الجزائر والبوليساريو باللي مخططاتها للتشويش على الزيارة ضعافت بزاف