اعباد الله راها كاينة اشياء كثيرة ماشي هي هاديك فقضية الصحرا. راه ما يمكن يدافعو عليها باقناع الا صحراوا الوحديين وعلاش مهمشين خليهن وحمدي والشرقاوي: هادو عندهم مصداقية كبيرة وخاصنا نتصالحو داخليا قبل ما نواجهو خارجيا

لا احد يعرف الغاية من المجلس الاستشاري الملكي لشؤون الصحراء. كان الملك دار فيه خطاب هادي سنوات وكال غادي يوقع فيه تغيير ومازال كنتسناو. قضية المجلس اللي نهار اللول تولد ميت ولا بغاو يقتلوه كتعطينا صورة واضحة على تعامل الدولة مع ملف الصحراء. المجلس عندو مصداقية وخليهن رقم اساسي ومهم بل وحاسم في المعادلة. شفتو نهار بغاو يتجاوزوه هو وخوه حمدي ولد الرشيد فالعيون وقعات كديم ايزيك. اللعب فين كيوصل.
الدولة عارفة ومتأكدة باللي خليهن وحمدي وطنيون وملكيون ووحديون، وعارفاهم باللي ما يمكنش يوليو مونيكات يتحكمو فيهم من الرباط ويلبسوهم الدراعيات ويرسلوهم بعد ما يحفظوهم شي كليمات. خليهن داهية فالسياسة وعارفة الدولة هاد الشي مزيان وحمدي "حيوان سياسي" ضابط الشأن المحلي. طبعا كاين انتقادات كثيرة توجه ليهم ويمكن ما يتافقوش معاهم فامور كثيرة داخلية، ولكن فالصحراء واضحين.
فقضية السويد ودول اوربا الشمالية حرمنا ريوسنا من اوراق مهمة. راه ماشي نبيلة منيب ولا غيرها من المسؤولين السياسيين اللي غادي يغير مواقف تلك الدول. حقاش ناقصاهم حاجة اساسية. ماشي صحراوة. المغرب بهاد التصرف يكرس فكرة ما مزياناش هو ان سكان الشمال كيتكلمو على سكان الصحرا. هادي خايبة للصورة خايبة للقضية. عندنا ناس وحدويين علاش ما يقودوش هما اللقاءات. ناخدو خليهن ما غاديش نكتبو التاريخ ولكن راه كان مرشح يكون اول رئيس للجمهورية مع حزب "البونس" اللي كان يرأسه فالعهد الاستعماري الاسباني. رفض والتحق بالمغرب. خوه شيخ من شيوخ تحديد الهوية يعرف تفاصيل الخارطة القبيلية في الصحراء وعندو تمثيلية شعبية لان السكان فتلك المناطق مصوتة عليه فالبرلمان والمجالس الجهوية والبلدية والقروية وطلع لحزب الاستقلال بوحدو 10 المستشارين اي انه قوة سياسية بوحدو. هادو كيعرفو الواقع الاجتماعي والاقتصادي والسياسي والقبلي فالمنطقة.
حسب مقرب من خليهن ل"كود" وعندما سئل عن تغييبه في مناسبات سابقة وفي هذه المناسبة رد "انا تحت امرة الملك ان امري بشيء اقوم به. مجلسنا اسمه المجلس الاستشاري الملكي يعني ايلى حتاجوني غادين يتصلو بي"
كاينة مؤسسة اخرى عندها مصداقية كبيرة ومهمشة من كل لقاء للدفاع عن وجهة نظر المغربية بدون مساحيق وهي اللجنة الجهوية لحقوق الانسان بالعيون التي يرأسها محمد سالم الشرقاوي. هادي كل المسؤولين الاممين وبعثات المينورسو وممثلي سفارات امريكا وفرنسا في المغرب كيتلاقاو معاه. خطابو واقعي قوي. لا يحابي الدولة ولا يتجنى عليها. هاد الخطاب هو اللي محتاجينو.
دابا بيني وبينكم تصورو حمدي ولا خليهن ولا الشرقاوي كلهم صحراوا وحديون واحرار يعني ما كيخافوش واش هادو ماشي هما المحامين الاقوياء والصادقين لقضيتنا سواء مع امريكا او مع السويد. تلك الشعوب تومن بالديموقراطية بحقوق الانسان وهادو هما بوحدهم يقدرو يجاوبوهم ويقنعوهم. باراكا ما نتلاعبو بقضية الصحراء ايلى كنا فعلا نعتابروها مصيرية لوجود الدولة المغربية. راه خاص كلشي يشارك وباراكا من قلة الثقة فصحراوا