موقف "كود": العجاب هادا. "كود" دخلات لمجموعة بلا خبارها. تعلن لقراءها باللي اللي تكتب كذوب وباللي فضينا حتى الشراكة مع كريم بناني وغادية تبقى كود كيف كانت تقدم "مغربا بلا زواق"

نشرت صحف الكترونية وغير الكترونية باللغتين العربية والفرنسية خبار كيكول باللي "كود" دخلات فمجموعة "اخر ساعة". بصدق ما كاين حتى شي واحد ف"كود" عندو علم بهاد الخبر. المفاجأة لكبيرة هي ان "كود" باش قبلات رجل الاعمال كريم بناني شريكا كان على اساس تطوير "كود" وما عمرو شي نهار جبد ولو مرة وحدة تكون شي علاقة مع هاد المجموعة. لسبب بسيط لو تجبدات شي مرة يستحيل شي نهار نقلبو ف"كود" يكون شريك لينا.
اذن ما نشر وما سرب عن تعيين شي شخص ناشر صحف منها "كود" كذوب. كذوب ان "كود" داخلة فهاد البيعة والشرية. كذوب ان "كود" عندها شي علاقة باخر ساعة ولا يمكن تكون عندها مستقبلا. بوضوح بلا زواق هاد الشي جا فوقت قررات "كود" توضع حد للشراكة مع رجل الاعمال كريم بناني.
هاد السيد ولد الناس الله يعمرها دار ولكن ما تفاهمناش معاه ما عمرنا نتفاهمو معاه. كل واحد كيتكلم لغة. لغتنا ف"كود" لغة حميد زيد لغة محمد سقراط لغة سهام البارودي لغة كل صحافي كيكتب ف"كود" ماشي هي لغة كريم بناني.
طبعا بحال اي ناس متحضرين غادين نتفارقو بطريقة ودية لانه كاين الاحترام المتبادل بيناتنا. "كود" من اليوم قررات وقفات شراكتها اللي كنا كنتمناو طور ما هو ضعيف ف"كود".
"كود" كيف عودات قراءها. اول من يجب ان يعرفو ما يقع فيها. كيفما لاحظو ما غيرناش خطنا التحريري. "كود" عندها مسافة مع الفرقاء السياسيين. ما نقبلوش وما قبلناش وما عمرنا نقبلو نكونو بوق الا للمغاربة. ما عمرنا قبلنا ولا نقبلو ولا غادين نقبلو نبيعو ريوسنا. اوفياء لشعارنا "ديما نيشان" و"مغرب بلا زواق" وحريتنا لا ثمن لها.