حزب الاستقلال عارف راسو هاد الايام ففوهة المدفع. عارف باللي مستهدف. كاينة جهة باغية تصفيها ليه. طبعا يستحيل قتل حزب مثل الاستقلال واخا كاينة جهات كتحلم بهاد الشي. الحزب يؤدي ثمنين: اولا ثمن موقفه الرافض لحضور اجتماع ثامن اكتوبر اللي كانو موجدين فيه رئيس لمجلس النواب وبغاو يضربو ضربة قاضية لحزب العدالة والتنمية وثانيا كيؤدي فاتورة مرحلة رئاسة حميد شباط. رئيس متقلب مرة مع هادا مع ضدو. دابا التحالف مع العدالة والتنمية مكتف. كتفو الحزب بمولاي حمدي ولد الرشيد ومحمد السوسي. يعني ما يمكنش ياخد شي قرار بلا رأي هادو. حزب فوضعية محاصرة نوعا ما ورئيس الحكومة المكلف عبد الاله بنكيران متشبث بيه لدرجة ان حكومتو موحالش تتكون بسبب فيتو ماشي غير التجمع الوطني للاحرار حتى حليفو الاتحاد الاشتراكي ومن خلال تصرفاته لحد الان ما مفاهمش معاه بسبب الصراع على شكون باغي ياخد رئاسة مجلس النواب. حزب فهاد الوضعية ممكن يلعب بورقة باش يضرب كاع الخصوم ديالو. هاد الشي كيقولوه قياديين استقلاليين ل"كود". "ممكن الحزب يطلع كبير ويضرب كلشي اللي باغي ينهش فلحمو ويعلن الدعم لحكومة بنكيران بلا ما يدخل فيها. غير خاص خطاب قوي مقنع فهاد اللحظة ماشي المعيور والسبان" يشرح مصدر "كود". فهاد الحالة بنكيران يقدر يدير حكومة فيها غير التجمع الوطني للاحرار مع الاتحاد الدستوري اللي لاصق فيه والتقدم والاشتراكية. فهاد السيناريو ممكن يكون عدد الوزراء قلال بزاف ويتم تجاوز حالة البلوكاج كلها. طبعا هاد الشي خاصو تجاوز هاد الفقصة اللي كيشعر بها كل استقلالي اللي تحول من حزب وطني الى حزب منبوذ من قبل بعض الجهات.
