اللي حرثو الجمل دكو. سيطايل اللي خلات "دوزيم" وتبعات "كوب 22" كلشي تضرب فزيرو مع ديك مولات الماكياج اللي باغية تخبي اثار التعذيب وشوفو كيفاش المغرب ولى فضيحة فكبريات الصحف العالمية

كود اسماء غربي //// اللي حرثو الجمل ف"كوب 22″ دكو ففضيحة "دوزيم" فصباحياتها اللي جابو مولات الماكياج توري للمغربيات فيوم مناهضة العنف ضد النساء طريقة باش ما تبانش عينيها زرقا ولا وجها منفوخ بالعصا. علاش جمعنا "كوب 22" بهاد الموضوع. حقاش المسؤولة على التواصل فاللجنة المنظمة لهاد الحدث بمراكش اسمها سميرة سيطايل اللي كانت اختها وخوها خدامين فهاد النشاط شي مكلف بالصحافيين الافارقة وشي خدام مع وكالة خدام المارشي.
سيطايل اللي هي نائبة مدير "دوزيم" يعني عندها مسؤولية مباشرة مع مدير القناة سليم الشيخ فهاد الفضيحة ديال الماكياج. علاش سيطايل حقاش شحال من مرة حيدات صفتها او بهاد الصفة وخرجات تحتج على تصريحات لبنكيران باش قال للمرأة ثريا. دابا من قصح ثريا ولا نخبيو العنف بالماكياج.
هاديك الصورة اللي ربح المغرب من "كوب 22" ديال دولة فيها حدث عالمي فمنطقة كلها مشاكل مشات مع هاد الفضيحة. حقاش كلشي الصحف العالمية تكلمات على الموضوع بالضحك بالجد المهم المغرب عند هاد الناس متخلف عندو اعلام عمومي وقح قادر يدير ماكياج للعنف. صعيبة بزاف بزاف هادي.
شوفو اش تكتب انتوما وشوفو شوهتنا "لاستامبا" و"لاروبوبليكا" الايطاليتين و"الكارديان" و"الانديبندنت"… ديال بريطانيا "نيويورك تايمز" و"الواشنطن بوسط" ديال ميريكان ما ما نهدرو على الصحافة الفرنسية والاسبانية وصحف اخرى عالمية. المغرب فيهم كلهم عندو صورة سلبية قاتمة مدافعة عن العنف ضد النساء