تعليم التطرف: غادي نعلن الحرب على سياسة الدولة فالتعليم قد ما قديت باش مايوقعش ليكم المصائب للي شفتها في تربية ولادي

عبد اللطيف اكنوش استاذ باحث جامعة الحسن الاول سطات //////
حكاية قصيرة وقعات ليا شخصيا هاذي مدة طويلة وللي رككبات فيا المرض على التعليم ديالنا…
واحد النهار في التسعينات، جاب ليا ولدي واحد الوريقة وكًال ليا راه الأستاذ ديالي كًال ليا: "سير جيب باك"..سوللتو ماكاين باس…قال ليا لا، والو، غير كان كايفسسر لينا "حرمت عليكم الميتة والدم ولحم الخنزير"، وسولتو :"علاش آ أستاذ الخنزير حرام؟"، وهو يجاوبني :"لحم الخنزير كايدير الكونصير آولدي"…قلت ليه :"ويلا آ استاذ كايدير الكونصير، معناه أنك لقيتي الدوا ديال الكونصير حينت عرفتي السبب ! ، وما بقا لينا غير نسددو ديك المعاهد ديال البحث حول معالجة الكونصير والبحث في أسبابو"..وهو يتفللق، وكال ليا: "خرج عليا حتى تجيب باك" !!
مشيت على وعدي وسعدي عند الأستاذ..استقبلني وهو كايشوف فيا من الفوق، وكًال ليا: "الولد عندك خاصو شويش دالترابي، أنا كانفسسر ليه أسباب المحرمات، وهو…". ماخلليتوش يكممل، وقلت ليه :"راه حكا ليا للي وقع، وراه عندو الحق،،،لأنني كانعررضو كل ليلة قبل ماينعس ماتيسر من فولطير وموليير وجان جاك روسو، ومقاطع من نظرية النشوء والتطور، ونتا كاتعاود ليه الخرريف…ثم علاه آ البهيمة المحرمات كاتتفسر؟ المكروه يمكن، المستحب يمكن، أما المحرم، راه محرم وسدينا…حنا ممنوع علينا الخنزير واخا بنين، واليهود محرم عليهوم الكروفيط واخا بنينة، والدرري عندي راه عارف هاذ الستون وتعللمهوم في الدار ماشي تسنى حتى جا لعندك يا الكيدار"…السيد وجهو زراكً، وحمار، ومن بعد صفار…وهو يحنزز فيا مزيان، وقال ليا: "اسمح ليا، ماشي نتا الأستاذ ديال كلية الحقوق؟ ناري قريت عندك في أواخر السبعينات، و…"..
عاود قاطعتو من جديد: "والله ما شرف ليا تكون نتا قريتي عندي، والله ولادي لا بقاو في هاذ المدرسة" !
من ذاك النهار، هززيت الدراري، وتسللفت وتكللفت، وديتهوم لثانوية المواطنين ديالي اليهود صحابي وللي تابعين في البرامج ديالهوم للبعثة الفرنسية، ماكاين لا عربية لا دين…غير باش نبععدهوم من هاذ النوع ديال التعليم القادوسي ومن التربية الإسلامية ديال هاذ الرهوط بالتحديد…وجاب الله التيسير…راهوم مشاو وقوودو فحالهوم وصبحو أطرعليا في بلادات الناس، وبجنسيات خرى..وخوكوم تهنى معا كررو، ولكن ماتهنناش على وليدات الناس…وهاذاك الشي علاش من هاذاك النهار، ولى الشغل الشاغل ديالي هو البحث في المنظومة التعليمية والتربوية ديالنا…لسبب واحد هو إعلان الحرب على سياسة الدولة في مجال التعليم على قدر استطاعتي باش مايوقعش للمغاربة المصائب للي شفتها في تربية ولادي أنا ننيت…