الباشا ولد خويا" يفتي في القزابري: هاذ بورزة الجاهيل للي قرا عند السواعدة وجايب معاه اللباس ديال العروبية ديالهوم باغي يفرضو على المغربيات، ويكًول ليهوم نفاقا وبهتانا أنه لباس إسلامي

عبد اللطيف اگنوش استاذ باحث في جامعة الحسن الاول سطات ///
– آجي آ "الباشا"، بغيتك تعطيني شي فتوى في واحد الكوعبي كايخطب في مسجد الحسن الثاني…
– شكون؟ داك الكرافسي؟
– آ لا…سميتو القزابري…
– بحال اليامان بحال اليابان، الله يرزق غير الصحة والسلامة…مالو هاذ الكوعبي ثاني آش قال لعباد الله؟
– هانا نقرا عليك آش كتب الموقع ديال "هيسبريس"، ونتا فتيني: "يصف الشيخ الشهير عمر القزابري، إمام مسجد الحسن الثاني بالدار البيضاء، الشوارع المغربية بكونها تعج بالعري الفاحش، ويناصر في نفس الوقت الحجاب والنقاب"…
– فسر ليا بعدا هاذ العربية ديال والو باش نفهم…
– كًال ليك أن "الكرافسي"…"القزابري" –سمح ليا- خطب في عباد الله وكًال ليهوم الزناقي في المغرب عامرة بالعيالات العريانات، وخاصصهوم يديرو ذاك الشي ديال نينجا ولا الفولارات ديال عريببان ديال الشرق…
– هاذ خيينا خاصصو الحبس وسددينا…
– علاش آ "الباشا"؟ علاه ماشي حرية التعبير هاذي؟
– حرية النم…يستاغل مسجد ديال الدولة للي مخللصينو المغاربة وكايصرفو عليه، غير باش يزرع التفرقة والنعرة بين المغاربة والمغربيات..هاذو لابسات طويل مزيانات، وهاذو لابسات قصير ندكًكًوهوم؟ منين جبتي ليا هاذ حرية التعبير ولا التخريب؟؟ هاذ المسائل يا الأستاذ ديال والو خاصو يتكللف بيها القانون ودوك للي كايطببقوه، ماشي هاذ بورزة الجاهيل للي قرا عند السواعدة وجايب معاه اللباس ديال العروبية ديالهوم باغي يفرضو على المغربيات، ويكًول ليهوم "نفاقا وبهتانا" أنه "لباس إسلامي"…هاذا خاصو الحبس وسدينا كًلت ليك…
– منين جبتي ثاني هاذ "نفاقا وبهتانا"؟ تقددمتي يا ولد الحرام في اللغة العربية للي كًلتي ليا ماكاتفهمهاش…
– أنا دابا كانورريك المشكل فاين كاين، ونتا كاتحنزز في صبعي؟ وا بورزة راه كايوججد باغي يصاوب مغاربة خرين أنا ما عممرني ماشفتهوم ولا عشت معاهوم، وما تعرفو دابا معا من خددام في هاذ الوقت ديال الحملات الانتخابية…وانا للي ماقاريش كانسممي هاذ الشي "عمليات التخريب" للي كًلتي ليا كا يعاقب عليها القانون، و…
– حبس حبس…نتا وليتي خاطار آصاحبي…كون عطاو لممك السلطة كون صيفططي كًاع هاذ بوزبال للحبس…
– لا آ الجاهيل…غير يعطيوني السلطة واحد خمس سنين، نشد ليك كًاع هاذ الرهوط للي كايديرو "التخريب" وكايحسابهوم "حرية التعبير في المساجد"، ونجيب زببور مهوم للعاذر، وماكاين غير الخدمة والجوع وتاممارا والعصا، حتى يولليو يمشيو على البيضة وما تتهررسش، ومن بعد عدموني آخويا كًاع…
– الله يجعل السلامة، والله ينعل الجهل ولد لحرام، الجهل ديالك وديالهوم…سير بععد مني خلليني نهبط للبحر، تفو عليك وعليهوم…
خلليتو كايموت بالضحك، وتكركبت بحالي للبحر وانا شبه متيقن بللي كلامو فيه بزاااف ديال الصح…