شفتو إيهاب كايهنأ المغاربة و الملك حيث رجعنا للإتحاد الأوروبي بعد غيبة طويلة ؟ … هادي بزاف عاوتاني

—
هو الصراحة بالنسبة للحاصلين على أوسمة مكنتوقعوش منهم أنهم يكونوا عباقرة ولكن على الأقل كيتمتعوا بالحد الأدنى من الكياسة والرصانة والتريث، وشوية ديال التواضع ، ولكن للأسف كل مرة كيخرج لينا واحد من حاملي الأوسمة بشي خرجة فضائحية ، فبعد اتهام سعد المجرد بجريمة اغتصاب حسب القانون الفرنسي ( فالمغرب كيسميوه التزافيط)، وحسب المراكشي الشهير فعيبنا واحد هانية.
ولكن باش يزيد يخرج حامل وسام آخر بتهنئة للمغاربة وللملك حيث رجعنا للإتحاد الأوروبي بعد غيبة طويلة ، فلا هادي بزاف عاوتاني ، هادي مافيهاش الحد الأدنى للكياسة والرصانة والتريث ، هو الصراحة فال زين ولكن للأسف كيعبر على جهل عميق حتى بأبسط الأمور الحياتية، وهاعلاش مهم التواضع فعادي أن بنادم كان يسول أي واحد حداه ويقوليه آش كاين هادشي فحالة لي حداه ميكونوش كيشبهوا لصاحبة الصرخة التاريخية إييهاب
ولكن لي ماعاديش هو عدم بدل أي مجهود للتحري من أجل عدم الوقوع فالغلط ، والمقود كاع هو المعجبين والمعجبات لي عتابروها خطأ إملائي ، الله أخاي تخالف ليك أوروبا بأفريقيا وتعابرها خطأ إملائي ، هاد المريدين كارثة أخرى أعظم من الإيقونات ديالهم براسها ، لي كيلحسو البعرة لأي فنان ويبداو يبررو الجهل والأخطاء ديالو، هو الصراحة مكناش كنتسناو منو يكون عندو مع السياسة ، راه غير إيهاب ولكن على الأقلا يكون عندو مع المنطق .

كنعيى نسول راسي على أي معيار كيتم اختيار من يوشحون بالأوسمة ، حيث فكل مرة كيبانو ناس غراب وربما بالنسبة للكثير مكيستحقوش يتوشحوا بوسام ، هو الصراحة معندناش بزاف لي يستحقوا نظرا لهزالة الإنتاج والإبداع والخلق فالعديد من الميادين والقضية خارية والى تم اعتماد شي معايير صارمة فراه قليل لي غادي يتوشحوا ، ولكن ماشي لدرجة يبداو يتفرقوا على من هب ودب ، وماشي لدرجة عدم احترامهم من طرف الموشحين بهم ، راه كيبقى وسام ملكي هاداك خاص الموشح به يحتارموا على الأقل ويرد البال مايطيحش فمثل هاد السقطات الحرة الغير محسوبة .

وخاص حتى من يختارون الذين سيوشحون بالأوسمة يتاقاو الله حيث راه قريب يولي عند كولشي ، فالعالم الكامل كيتوشحوا الناس لي قدمات لبلدانها أو للعالم حاجات مهمة سواء فن أو علم المهم إبداع حقيقي ، وفالمغرب كيبانليك بحال شي لعبة حظ الى عندك شي زهر تقدر تتوشح فأي لحظة ، بدون ماتكون قدمتي شي حاجة تستحق الذكر فأي مجال ، بالإضافة الى أنه فالعديد من الأحيان كان كيتم تجريد الحاصلين على أوسمة الى دارو شي فضيحة ، بحال ملي جردات الملكة اليزابيت الملاكم نسيم حميد من بعد سجنه بسبب حادثة سير ، كذلك جردت الملكة اليزابيت الفنان الأوسترالي رولف هاريس من التكريم بعد أن تبث في حقه قضايا ديال التحرش الجنسي ، وحتى هنا خاص يتم تجريد البعض من الأوسمة ديالهم نظرا لغبائهم ولعدة أسباب أخرى ، الوسام الملكي راه تكليف وعندو شروط ماشي حصانة لممارسة البلاهة تمنح للبعض