بالصور: ليلة كحلا فالدار البيضا: الترات رجاوية دارت الرعب بسباتة. هجمو على عرس وهربات لعروس ولعريس ورعبو هاد الاحياء وهرسو 30 طونوبيلة وتقسمو للبوليس فالزناقي: تشدو 2 والباقي هارب

وايس بريس = تصوير عبد الرحيم بجوري صور ايس برس /////
عاشت احياء بسباتة عمالة ابن مسيك سيدي عثمان بالدار البيضاء ليلة رعب حقيقية. هاد الشي بدات الشرارة الاولى دبالو بكري وفق مصدر "كود".
كانت "الترات" نادي الرجاء البيضاوي دايرة اجتماع ليها فملعب اسيما قريب من السالمية فنفس العمالة وسالى مع الربعة العصر. باش سالاو بغاو غاديين مجموعين والبوليس تابعهم. باش تفرقو مع الخمسة كل واحد مشى لحال سبيلو٬ تشرح مصادر "كود".
واحد الشعار فدرب الكدية بسباتة قلق فصيل وفالليل رجعو صحاب الالترات وهجمو على خصومهم فثلاثة الاحياء "الكدية" و"المسعودية" والديور اللي حدا شارع "ادريس الحارثي" وخلطو كلشي وحرقو طونوبيلات وهرسو بيبات وهجمو على عرس بالفلام حتى هربات عروسة والعريس وخافو الناس حدا سينما المدنية. مساكن حتى تاكدو باللي مشاو وحضر البوليس عاد كملو عرسهم ولكن كلشي كان تهرس ليهم٬ يشرح مصدر "كود".
هاد الحالة كان صعيب للبوليس يتعامل معاها لانهم تقسمو فالدروبة ودارو بحال حرب العصابات فالمدن. تجمعوا مجددا مع لحداش تقريبا وشكلوا مليشيات مسلحة فرضت حظر التجول في المنطقة وخربت ممتلكات الغير. هاد الشي بقى حتى لشي الثلاثة الصباح،
حسب مصادر "كود" فانه تم اعتقال 2 من مدبري الهجوم فيما مازال البحث عن باقي الافراد اللي كانو شي 40 واحد صغار فالسن.
وفق نفس المصادر ل"كود" فان عدد السيارات اللي تهرسات وتخربات وصل ل30 طونوبيلة لناس مساكن ساكنين فهاد الاحياء ما عندهم حتى علاقة بحرب الالترات
ومن المتوقع ان يستعين رجال الامن ببعض تسجيلات كاميرات المراقبة المثبتة في بعض المحلات التجارية والوكالات البنكية في حي اسباتة لتحديد هوية مهاجمين كانت غالبيتهم تضع أقنعة على وجوهها.