مريم بنصالح اللي بغات تاخد بلاصة مولاي حفيظ العلمي قمرات على العود الخسران. تزريطات حتى قنعات وخرجات صفر وزارة

رئيسة الباطرونا مريم بنصالح اللي روجو اللي قراب منها ولا صحابها باللي تصلح تكون رئيسة حكومة وباش تعرفوها كيف دايرة تيقات خرجات بوالو فهاد الحكومة. بنصالح اللي غادية تسالي ولايتها فالباطرونا شحال وهي تزريط باش تولي وزيرة. حلم هاد السيدة كانت حقيبة الصناعة والتجارة والاستثمار ماشي حقاش كتفهم فهاد الشي للا ولكن حقاش باغية تاخد بلاصة مولاي حفيظ العلمي.
احلامها مشات فالخوا وما تعينات لا وزيرة ولا سيدي بوزكري.
السيدة دارت اجتماعات قبل الانتخابات باش تقول لرجال الاعمال عاونو البام وهاد الشي تكتب فصحف محلية واجنبية واخا هاكاك كانت طامعة فشي صاكادو فهاد الحكومة. الساعة خرجات خاسرة.
شفتي فاش دخلتي الباطرونا فالسياسة اش كيوقع.