كيفاش كانشوف مستقبل تاشياخت فالمغرب في ظل حكم السلفية ؟

—
اليوم قبل ماننعس قريت ماتيسر من المقالات ديال بعض شيوخ التلفية( السلفية) فالمغرب و الردود ديالهم على أبو حفص صاحبهم لي محسوب عليهم و لي قال بلي القسمة ديال الورث ماشي خط أحمر بمعنى ممكن يتعاد فيها النظر على اعتبار أنه الزمان تبدل و دابا المرا ولات تاهي كاتهز الأسرة و كاتخدم و تجيب الگرمومة و تخلص الطريطات، و بالتالي من المنطقي أنها تورث فحالها فحال الراجل ! طبعا هاد الهضرة ماكايحملوهاش اللحايا! حيت الورث هوا داك التيران الصغيور لي بقا ليهم باش يتبوردو فيه خصوصا مورا ماجات المدونة و خربقات ليهم الحسابات و لقاو راسهم فالتوش، ايه مساكن اللحايا تصدمو ملي فهمو بلي القوانين فالمغرب "قوانين وضعية" غادية و كاطور و كايخصها تتبع القوانين العالمية، الصدمة كانت قوية،و دابا مع الصدمة ديال الورث راه قربو يفگسوهم ! وماخلاو فصاحبهم لي خرج ليهم من الجنب غي لي نساو ها السفيه ها المعتوه ! العلماني ( حيت هوما كي شتي العلمانية عندهم معيورة) لاعق أحذية الملاحدة المنافق و هلم جرا !
غي خرجت من الصفحات ديال الكتاني و الحدوشي و أبو النعيم فحالا خرجت من وسط فيلم الرسالة حتى لقيت راسي قدام واحد الفيديو بارطاجاه واحد الصديق فالفايسبوك ديال اللعابات فيه واحد الشيخة كاتغني على العضو الذكري " ها هوا تاني و تاني … فحال العسكر لا مق*** ، هاهوا تاني و تاني ، فحال اللوحة فالفط***حة، فحال الحولي فالسط…حة هاهوا تاني و تاني" و سالاتها بواحد الشطحة عالمية و هي كاتحير و كاتغني واحاه حاه واحاه حاه وا حاه حاااه …
قلت مع راسي و دابا هاد الشيخة مسكينة و هاد العيالات لي ناشطات معاها شنو غايكون المصير ديالهم لا شدو فحال الحدوشي و أبو النعيم و الكتاني القرارات ديال هاد البلاد و الآراء ديالهم خرجات من الافتراضي و شفناها كاطبق فأرض الواقع ( الله يستر ! Touchons le bois) ! واش غايخليو هاد الشيخة و رباعتها يعيشو و يمتعونا و يغنيو لينا هاهوا تاني و تاني ؟! ولا غاتولي الوسيلة الوحيدة للترفيه المتاحة هي شي رباعة ديال المنشدات هازين البنادر و كايغنيو على الزميطة " وااا لالة نبدا بسم الله واا الزميطاااا … آ و الصلا على رسول الله وااا الزميطااا …"!؟!
تخايلو معايا يكون عندنا صناع القرار هوما هاد الناس ! يكونو كايحكمونا هاد الناس و عندهم سلطة على المغاربة كيفاش غادي نكونو عايشين ؟
واش غايكون عندنا الحق نجيبو الشيخات فالعراسات و نعلقو ليهم الربعالافات و لا غاتولي مفروضة علينا مجموعة الأشواق للسماع و المديح؟
واش غانقدرو نريزيرفيو فشي كاباري جاية ليه الشيخة التسونامي و نتمتعو بالدرديك ديالها و مع كل درديكة نحسو بلي الارض كاتزعزع و نوضو نغرمو عليها النص ديال الصالير باش تقول فخاطر "دكالة و دكالة و دكالة " و مع كل دكالة تكمش شي عشرالاف و تلوحها عليها ! و لا غايتسد البار و الكاباري و غانحضرو للشيخة التسونامي كايجلدها شي بولحية فكازا حدا ساحة ماريشال و هوا كايغوت " هااا المساسط لي كايشطحو! ها المساسط لي كايديرو الفتنة "؟
واش الفلاح المغربي غايبقا عندو نفس الحماس باش يكربل و يزرع و يشد الما و يحصد ويزيد لينا القدام بالمخطط الأخضر و هوا عارف راسو بلي الزويهرة و مويليكة و طامو فرشخات ليهم فرقة المطاوعة الطعيريجات لي يكسابو و منعات عليهم يغنيو العلوة و مولاي الطاهر و لي لابغا يفوج خاصو يتصنط الكاسيطة ديال يا طيبا يا طيبا يا دوى العيانااا ؟
واش غاتولي تدخل لليوتوب و دير chikhate maroc و لا chaabi stati و تلقا غا يديك و الريح و يقولو ليك "لقد تم حجب هذا المحتوى من بلدكم"
كيفاش غايكون مستقبل تاشياخت في ظل حكم السلفية فالمغرب؟!