أنا دماغ ماشي طَرطُور !

بقلم : الطيب آيت أباه -رئيس لجنة الإعلام والتواصل لغرفة التجارة والصناعة والخدمات لجهة الرباط سلا القنيطرة
عمّرني ماننسَى واحد النهار أيّامات الثانوي ، غير رشقات لييّا وأنا نهْبّط الموطور ديال واحد البيجو 103 كانت عندي ، قلت مع راسي ، علاش مانديرش لبُوه الدّيكالامِيناج بنفسي ، بلا ماندّيه للسّيكْليس ، ونوَفّر ديك التقرقيبة ديال الفلوس ، ومنها نخوض تجربة جديدة ؟
بالفعل ، شتّت وَالْدِيه هاداك الموطور ، وغسلت يمّاه بالإيصونص ، وبديت تانركّب فيه بيَاسة بيَاسة ، حتى مُونطيتُو كامل . وهاكذاك كان بالفعل ، إلاّ أنني ماعرفت فاين ندير واحد الرُّوسُور صغير شاط لييّا ف الآخير ؟
الصراحة مابقاش عندي الخاطر ديال نعاود نقلَّب على بلاصةْ هاداك الرُّوسُور ، حيث نِّيت ماشي شي حاجة مْعمْرَة العين ، وقرّرت ندير آمارش ، وللي بغا يطرى ، غير يطرى !
المدهش ف الأمر أنني بقيت كانستعمل هاداك الموطور لمدة طويلة ، حتى بعتُو لجاري من بعد ، ولكن بقيت محتافظ بذاك الرُّوسُور إلى يومنا هذا ف المُخيلة ديالي ، على أساس أننا جنس من البشر ما تاتهموش وسيلة الوصول ، بقدر ما تاتهمو غاية الوصول !!
صراحة حنا واعرين ف البريكُولاج ، والأمثلة ديال الرُّوسُور (زايد ناقص) متعددة ، وهي أصلا للي مْخَلْيانا دايما أومبان ف الطرقان ، ومناسبة هاد الحديث ، هوَ شي ناس ف قطاع التجارة ، ماشي غير فْرتكُو الموطور ديالو ، ومن بعد عاوْد جمْعوه ، وشاطو ليهوم الكْرُووّات ! بل الأخطر من هذا ، أنهم من نهار عرفناهوم ، وهُوما هازّين السّوَارت والطورنوفيسات والكْلامونيطات على بعضيّاتهُوم ، ومْدابزين على شكون البّاطرون ، ف الوقت للي الصدى دايْر خْبْلَة ، وتايْنهش ف المحرك ديال القطاع .
هاداك الرُّوسُور للّي شاط لييّا قرن وزمّارة هاذي من الموطور ، مابغاش يتصرط لييّا ، وداكشي علاش أنا ماغادي نرتاح حتى نديرو ف بلاصتو ! لأن العباقرة للّي صنعوه نهار الأول ، تايخدّمو عقولهوم ف الإضافة والتطور ، ماشي بحال شي بعضين ، من نهار عقلنا عليهوم ، وهوما ضرب ونقص ، تقول صايمين بالجميل .
شوف آعمي ، راه سْمييْت المناضل ، ماشي غير ضرب جوج دورات على بيت الشركة أوْ مكتب المسؤول ، وتمشي تتجبّد ف دارك ، تاتسنا المُهنئين يجيبو ليك السكار . النضال اليوم آعمي ، راه هو هذاك الرُّوسُور للي خاصّو يرجَع لبلاصتو ، باش على الأقل نخلقو الإنسجام بين العقل المُبتكِر والعقل المستهلِك ! وشوف آعمي ، راه غير أنا كان عندي ف الماضي مشكل مع مُوطُور ، وأنت اليوم عندك مشكل مع دماغ ماشي طَرطُور !!
- يُتبع ... غير وْجّدو رُوسكوم للفِيضُونج !!