شابو لبوريطة جابها فالتسعين. الديبلوماسية طلعات للجبل مع هولندا وطيحو كواريهم

ناصر بوريطة وزير الخارجية والتعاون محيح. الدق والسكات. نهار خرج المغرب بيان كيقول لهولندا بلغة ماشي ساهلة ماشي بزاف ديبلوماسية سلمي لينا سعيد شعو ومعاها استدعاء السفير المغربي في هولندا للتشاور بزافت الناس ومنهم "كود" اعتقدنا خاطئين باللي الخارجية سخن عليها راسها. خاصة مع رد وزارتي الخارجية والعدل الهولنديتين اللي من غير ما فهموش الموقف المغربي جبدو قضية حماية قانونها للدولة لسلطة الدولة.
اعلان المغرب اليوم باللي سعيد شعو تشد وغادي يتسلم للمغرب بين باللي الخدمة اللي دارها بوريطة والفريق اللي معاه مزيانة وبزاف. طلع معلم وبزاف. دولة قوية بحال هولندا تقبل شروط المغرب ماشي ساهلة. ماشي ضروري كيفاش قبلاتها المهم ان المغرب ربح منها.
مع حكومة بنعرفة اللي ما كنسمعو حتى شي حاجة كتفرح كيظهرو لعابة مزيانين. ماشي حقاش بنعرفة فيدو ابدا ابدا. بل حقاش هما اللي فيدهم. عارفين اش كيديرو.
بوريطة من نقط الضوء فهاد الحكومة المنحوسة. فاوض وخدم والمغرب خرج رابح