مسلسل مكسيكي ديال العبث فالخارجية عند بوريطة وموظفه الفعفاع. دارو بيان فاهمينو غير هما وها تفسيرهم اللي عطاوه للصحف وها التقليزة اللي دارت ليهم الجزائر وخايبة بزاف

وزارة الخارجية والتعاون من عبث لعبث. السيبة فهاد الوزارة اللي شاديها وحدين نهار على نهار كتبان هوايتهم. الفعفاع ما نهدروش عليه ما فيدوش وارتكب اخطاء كثيرة وبين انو ما صالحش للخارجية. فيستة كبيرة عليه وفضايحو اللي خرجاتها "الاخبار" وما قدرش يكذبها عطات. كنا معولين على ولد الدار ناصر بوريطة الوزير المنتدب فالخارجية. طلع خفيف وما فيدوش فشي حاجة اسمها التواصل.
دابا انتوما حكمو على هاد البيان اللي نشرناه ف"كود" البارح ونعاودو نرجعو ليه "أدانت المملكة المغربية بشدة المناورات المتواصلة لرئيسة مفوضية الاتحاد الإفريقي، التي تسعى لعرقلة قرار المغرب استعادة مكانه الطبيعي والشرعي داخل أسرته المؤسساتية الافريقية". باش تقراو هاد الفقرة غادين تبغيو تعرفو علاش هاد الشي. جات الفقرة الثانية اللي باينة كتبها بوريطة " هكذا، وبعد أن أخرت، بشكل غير مبرر، توزيع طلب المغرب على أعضاء الاتحاد الإفريقي، تواصل السيدة نكوسازانا دلاميني زوما تحركها للعرقلة، من خلال اختلاق شرط مسطري غير مسبوق ولا أساس له لا في نصوص ولا في ممارسة المنظمة، والذي كانت ترفض من خلاله بشكل تعسفي رسائل دعم المغرب الصادرة عن وزارات الشؤون الخارجية للدول الأعضاء بالاتحاد الإفريقي". اش نا هو هاد الاجراء غير المسبوق اش نا هو هاد التعسف الله يرحم بوكم خرجوه نعرفو.
تجي الفقرة الثالثة " رئيسة مفوضية الاتحاد الإفريقي تتناقض مع واجبها في الحياد وقواعد ومعايير المنظمة وإرادة بلدانها الأعضاء". كتكول مزيان قربو كيكولوها باش جبدو التناقض وعدم الحياد. تجي للفقرة الاخيرة وتصدم "المغرب يحظى حتى الآن، بالوثائق الداعمة، بالمساندة والموافقة الكاملة للغالبية العظمى للدول الأعضاء، التي تفوق بشكل كبير تلك المنصوص عليها في القانون التأسيسي للاتحاد الإفريقي. هؤلاء الأعضاء سبق لهم أن وجهوا لرئيسة مفوضية الاتحاد الإفريقي رسائل دعم، رسمية وسليمة قانونيا، لقرار عودة المغرب إلى المنظمة الإفريقية ابتداء من القمة المقبلة".
وبيان اعباد الله كلو ما فيهش علاش هاد الكعية. خاصنا نتسناو خرجات بوريطة فالصحافة. قال ل"تيل كيل" وطبعا كال ليهم ماديروش اسمي ودارو "مصدر ديبلوماسي" وحنا عارفين باللي هو بوريطة. كال ليهم ان "زوما رئيسة مفوضية الاتحاد الافريقي طالبت من وزراء الخارجية الافارقة بموجب مذكرة توقيع رؤساء الدول الافارقة على انضمام المغرب من عدمه للاتحاد الافريقي وليس توقيع وزراء الخارجية كما ينص على ذلك قانون الاتحاد الافريقي. السيد اضاف ان المغرب عندو رسائل اكثر من 28 دولة اللي هي النصاب القانوني باش يرجع المغرب لهاد الاتحاد اللي خرج منو فالثمانينات احتجاجا على عضوية البوليساريو.
وباش هاد الشي علاش ما شرحتوش فالبيان وعلاش تخبيتو وسكتو. علاش كضحكو على المغاربة على السياسيين على الاحزاب على كلشي.
دابا دابا التفسير المغربي ارا نشوفو التفسير الجزائري اللي خرج فموقع "كل شيء على الجزائر" =توس سير الجيري". كال ليهم وزير خارجيتهم او الناطق الرسمي باسم الوزارة ان "زوما طلبات من المغرب التزام كتابي فيه اعتراف بالبوليساريو والحدود الاستعمارية للصحراء الشرقية". طبعا هاد الرواية كذوب حقاش بزافت الدول الافريقية المؤسسة للاتحاد الافريقي ما معتارفاش بالبوليساريو وتعترف بالسيادة المغربية على الصحراء ولكن شوفو الغموض ديال البيان كيفاش كيتم تفسيرو باش يضربو الدزايريين المغرب. شفتو على برا كاسي عندنا فالخارجية. ما فيدهمش