الاحتقان غادي ويكبر فالريف. سمعو حوار بين مواطني المنطقة والوالي اليعقوبي: بغينا الملك يجي يحل المشكل وناصر صوتنا كلنا وكتحسسونا ريافة ماشي مغاربة

نقاش بين أبناء حي تيغانمين و الوالي اليعقوبي حول إعتقال ناصر الزفزافي .هههههه جراو عليه . الوالي القرقوبي لعنة الله عليك الى يوم الدين .تحية لأبناء تيغانمين .#بارطجي
Publié par AlhoceimasOfficiel sur mercredi 31 mai 2017
حوار كيبين اش كاين حقا فقلوب ناس الريف هاد الايام. كيكشف الحكرة والفقصة والاهانة اللي كيعيشوها ريافة. المشهد فيه الوالي ديال طنجة الحسيمة تطوان اليعقوبي ووراه المفتش فالداخلية اللي داروه عامل الحسيمة محمد فوزي.
شباب من الريف دايرين بالوالي كيتحاورو معاه.
احدهم اثار بيان الوكيل العام على احداث الجمعة الماضية.
الوالي اليعقوبي رد: البلاغ دارتو وزارة الاوقاف =ماشي وزارة الداخلية= ودارت دعوة للقضاء.
المواطن يشرح له حتى وان اخطآ الزفزافي ودخل للجامع علاش اعتقلتو عشرات الشباب. ثم يضيف "ايلى كنتو معتابرينا مغاربة" وجبد ليه الامن
الوالي يرد: خليني نهدر الله يجازيكم بخير. راه الامن مغاربة" ثم يضيف ان رواتبهم من دافعي الضرائب لحماية المواطنين
يرد المواطن : علاش مشاو عند كلشي ماشي غير عند واحد
هنا الجو غادي يسخن اكثر.
مواطن اخر: الامن لحماية المواطن ماشي المواطن.
ثم اضاف: راه اكبر خطأ كتمارسو وزارة الداخلية كتحسسنا ريافة ماشي مغاربة
الوالي اليعقوبي: انتوما مغاربة
مواطن رابع : ما يقدرش شي حد يشكي فشي كوميسارية. غير يدخل يقولو ليه سير عند ناصر الزفزافي
ثم بدأ مواطن يعد له احداث بقات عالقة فذاكرة ريافة 57 و84 و2011 واضاف "تعاملو معنا فهاد المنطقة كيف ما كتعاملو فالصحرا بواحد الحساسية.
خرج صوت مواطن اخر : بوليسي كيقول ليك ولد الصبليوني.
المواطن الاول: ما كنتحدثوش عليه السي الوالي
الوالي: هاد النقاش مزاين عندي اقتراح جيو 5 ولا 10 هاد الشي كاين ولا ما كاينش اش كيقول القانون
صوت اخر لمواطن مقلق: قالها الزفزافي.
الوالي: انا كلست مع النشطاء
المواطن يرد: هادوك ماشي نشطاء هاديك جمعيات استرزاقية. هادوك غير استرزاقية. علاش تشدو الدراري علاش
بدات الهدرة وكلام كثر
مواطن اخر: السيد الوالي هادي نقطة خاصو يعرفها الوالي والحاشية ديالو والدولة. البطل الشهم الزفزافي كيهدر بلسانهم
مواطن اخر: طلقو لينا المعتقلين ولا شدونا كاملين. راه غادين نموتو
مواطن يطلب "شوية السكات"
اخر يرد : هاد الشي هدر عليه الزفزافي. حنا مع الملك بغيناه يجي يحل لينا المشكل.
صوت اخر: وا الوالي طلقو لينا خوتنا
الوالي بعد الاحتقان شوية غادي فحالو ومواطن يردد: عاش الريف لا تجيو عندنا. مغاربة ريافة