تفاصيل حصرية على الطرد المهين للامير هشام من تونس. دوز اكثر من ساعة فكوميسارية بلا ما يهدر معاه حد وركبوه فاخر كرسي للطائرة وخداو ليه الباسبور ديالو وها اش كان طالب المغرب

حصلت "كود" على تفاصيل حصرية حول الطرد المذل اللي دارتو السلطات التونسية الليلة للامير مولاي هشام ابن عم الملك محمد السادس وطرداتو من بلادها.
الامير اللي كان عندو جوجت الندوات وحدة يوم 9 شتنبر والثانية يوم 11 شتنبر قبل ما يطير لقطر يدير ندوة اخرى يوم 13 من الشهر نفسه٬ اعتبر شخصا غير مرغوب فيه في تونس.
المغرب وفق مصدر "كود" كان طلب من السلطات التونسية بشكل صارم موقفها مما يحدث داخلها من انشطة ضد المملكة المغربية. اي انه ما كان طالب والو غير يدافع على راسو وتعاملو تونس كيف كيعاملها. باينة شي جهات فتونس بنعلية الهوى دارت اجتهاد كبير وحقاش ما عندهاش الحق تمنع نشاط عطاتو رخصة لشبيبة حزب كيشارك فالحكومة جراو على الضيف المشكلة.
حسب مصدر "كود" فان الامير اللي جرجروه من الفندق داوه لكوميسارية المنزه وبقى فيها ساعة ونص وما هدر معاه جتى حد ومن بعد قالو ليه خرج فحالك من بلاد. طبعا تشرح مصادر "كود" داوه لطائرة غادية لباريس تابعة للخطوط الفرنسية وركبوه وفق مصدر "كود" فلكراسى لخرين بشكل مهين وحيدو ليه الباسبور ديالو وبقى عند البيلوط حتى وصل لفرنسا وسلمو ليه
المغرب وفق مصدر تونسي ل"كود" ما كانش طالب هاد الشي. كان عندو مشكل مع انشطة تنظم في الجمهورية ضد الدولة المغربية فالتوانسة مشاو بعيد وهانو امير ابن عم الملك. موحالش يبقى يحط رجلو فتونس