وشوف اش وقع للارام زمن عدو ولى كلشي كيعدي . مسافرين نساو بكاجهم فنيس واخرين كالو ليهم ما دخلوش المطار حتى تخرج شخصية مهمة

شي كيضحك وشي كيبكي فلارام. السيبة مع هاد عدو. من نهار جا هاد المدير الجديد وكلشي غادي بلمقلوب. اليوم وقعو جوجت لحوايج كتبين احتقار المسافرين كيتبين ما كاينش مسؤولين. الرحلة AT715 اللي ربطات من نيس الفرنسية والدار البيضاء وقعات فيها حاجة موحالش كتوقع فشي خطوط محترمة. المسافرين وصلو مع الخمسة وبقاو يتسناو الباكاج حتى السبعة. جات وفق ما نقله احد المسافرين ل"كود" اوطيست وكالت ليهم ببرودة سمعو لينا راه نسينا الباكاج ديال كاع المسافرين.
واش كاينة شي خطوط جوية كتنسى باكاج المسافرين فين هاد ليكيباج وفين هاد البيلوط وفين هاد الشاف ديسكال وفين وفين. خبار كيضحك ولكن المسافرين كاعيين. غادية تدخل فالاخبار المضحكة فاخر السنة.
الحاجة الثانية اللي المسافرين حسو بالاهانة وقع فمطار الداخلة وكعاو على لارام واخا ماشي مسؤوليتها. فقد نقلت مصادر "كود" ان الامن اغلق مطار الداخلة في وجه المواطنين من بينهم حالة وفاة ومنعهم من حجز تذاكرهم. السبب وفق مصدر "كود" "جاية شي شخصية وحتى تنزل طيارتها". واوضحت مصادر "كود" ان المسؤولين كالو للمسافرين اللي بقاو حدا الباب انهم تلقو تعليمات عليا بعدم السماح لاي كان بولوج المطار حتى مغادرة الوفد كله المطار. لارام قالت ان الرحلة وصلت فوقتها وما كان حتى شي تاخير وشددت على ان دخول المطار في وقت معين ماشي تخصص ديالهم "المهم الناس وصلات فوقتها ما تعطل حد" يشرح مصدر "كود".