خاص. اش نا هي عمليا "عدم رضى الملك علي شي حد": ها اللي كيتسنى مساخيط سيدنا: يرجعو الاوسمة وما ببقاو يحضرو حتى لشي مناسبة ويغبرو

البارح فبيان الديوان الملكي قال باللي "المسؤولين في الحكومة السابقة المعنيين كذلك بهذه الاختلالات =كيقصد "منارة المتوسط"، قرر الملك تبليغهم عدم رضاه عنهم، لإخلالهم بالثقة التي وضعها فيهم، ولعدم تحملهم لمسؤولياتهم، مؤكدا أنه لن يتم إسناد أي مهمة رسمية لهم مستقبلا. ويتعلق الأمر بكل من :
رشيد بلمختار بنعبد الله، بصفته وزير التربية الوطنية والتكوين المهني سابقا ؛
لحسن حداد بصفته، وزير السياحة سابقا ؛
لحسن السكوري، بصفته وزير الشباب والرياضة سابقا ؛
محمد أمين الصبيحي، بصفته وزير الثقافة سابقا ؛
حكيمة الحيطي، كاتبة الدولة لدى وزير الطاقة والمعادن والماء والبيئة، المكلفة بالبيئة سابقا"
السؤال هو اش كيعني عدم الرضى ديال الملك على شي حد. فالبيان قال فقط شكل واحد من اشكال كثيرة على عدم الرضى وهو عدم اسناد اية مهمة رسمية لهادو. المصيبة الكحلة هاد الشي راه قليل بزاف. كاين ما هو اصعب بالنسبة لعقلية هؤلاء.
فزمن الحسن الثاني وفق ما علمته "كود" كان شي 21 حاجة كتحرم منها الشخص اللي ما بقاش عندو رضى الملك ووفق مصدر "كود" مع الملك محمد السادس وصلات لشي 28.
بالاضافة الى عدم اسناد مناصب كاين امور بسيطة وقاصحة فنفس الوقت. دابا هادو وفق مصدر "كود" ما غادينش يبقاو يحضرو حتى لشي نشاط ديني او عائلي او وطني يرأسه الملك شخصيا. زيد على هاد الشي وهادي قاصحة بزاف ايلى كان هاد اللي ما راضيش عليه سيدنا عندو وسام يرجعو. داخلة فعدم الرضى.
اما حفل الولاء وعيد العرش والشي لاخر يستحيل يحلم بيها شي نهار ولا يحضر فيها والملك هو اللي كيرأسها.
كاينة نقطة اخرى وهي ان بعض الشخصيات كيمثلو المغرب فمناسبات داخليا او خارجيا. هادو اللي ولاو مساخيط سيدنا ما عمرهم يحلمو بهاد الشي. بالمختصر المفيد. بعدو من الشمس وغاديين يبقاو فالظل الى اخر يوم فحياتهم.