حقا من حق أي واحد يتضامن ويتعاطف ولكن من منطق إنساني برؤية واضحة للأمور أما هاد التضامن الإيديولوجي راه كيكون معمي وفحالة المغرب راه بحال الى تعاطف شي جائع من جنوب السودان مع فقراء أمريكا بعد شي إعصار‎

نهار كينوض شي تلميذ كيضرب الأستاذ ديالو ، أو شي مجموعة ديال البراهش يتعداو على شي مراهقة ، أو أي فضيحة من فضائح هاد الجيل الكثيرة ، كتلقى النس لكبار كيبداو يتغناو علينا بداك الديسك ديال حنا كنا كنحتارموا حنا كنا كنقراو مزيان حنا كانت عندنا قيم ووعي ، بينما فالحقيقة هاد الجيل هو نتيجة طبيعية لكلخ الجيل لي قبل منو ولي جابو للدنيا، وأبسط صورة لهادشي هو الفئة العمرية لي خرجات فمسيرة التضامن مع فلسطين ، هاد الناس لس مخرجاتهم تاحاجة من الكوارث لي وقعو مؤخرا فالمغرب ، وآخرهم 16 مواطنة ماتو تدافعا على خنشة ديال الطحين ، كتلقاهم خارجين بكل فرح باش يسبو أسرائيل وميريكان للمرة الألف ، ولي طبعا بدون نتيجة .
راه هادو هوما الكارثة الحقيقية لي كيعاني منها المغرب ماشي هاد الجيل ، وإنما هاد العقلية القديمة لي كتعيق التحديث فالمغرب بالأفكار والمواقف التقليدية وبتبني قضايا معندنا بيها علاقة ، وكانت طيلة عقود مخدر للشعوب كتستعملوا الأنظمة ، وهادو لي كيقولوا على راسهم راه واعيين وفاهمين وعايقين بالقالب هم أكر محافظين على هاد القالب وورثوه جيل بعد جيل ، تقولبوا هوما وسايرين كيقولبوا معاهم الجيل لي تابعهم ، وفاللخر يبداو يسولوا على قيم المجتمع فين مشات ، طبعا راها مشات فتبني القضايا الخاسرة من منطلق إديولوجي إسلامي ويساري ، وتوريث مثل هاد القضايا.
حقا من حق أي واحد يتضامن ويتعاطف ولكن من منطق إنساني برؤية واضحة للأمور ، أما هاد التضامن الإديولوجي راه كيكون معمي ، وفحالة المغرب راه بحال الى تعاطف شي جائع من جنوب السودان مع فقراء أمريكا بعد شي إعصار ، راه هاد البلاد ليمن خليناها ، كتدوز فضيحة من ورا فضيحة ورد فعل الشارع كيكون ديما هو الصمت مأنه غير معني ، وحتى الناس لي كيحركو الشارع كيكتافيو بظرطات فايسبوكية وخرجات على وسائل الإعلام فيها الكثير من حب الظهور أكثر مما فيها من الحسرة والتعاطف ، المغاربة ضحايا هاد السموم الخوانجية واليسارية ، ولي نتيجتها جيل تالف ماعارفش حتى شناهي قضيتو الحقيقة وملي كاع كيبغي يتخلص من بقايا هاد السموم ، كيظهروا حراس المعبد الوثني النضالي من جديد فالشارع باش يفكروه فقضية لي دازت أجيال مستلبة بيها ، راه خاص قطيعة حقيقة مع هاد الناس لي راه هوما حراس التخلف وهما مورثيه .