المسؤولين بالقصر الكبير باغيين قصراوة يدابزو مع بعضياتهوم

باش ميتوحدوش ويطالبو بالحقوق ديالهوم … را حنا عايقين بيكوم … ولكن راه غاديين تتحملو المسؤولية فكولشي …
خوتي قصراوة الاحرار و القصراويات الحرَّات حنا عايقين بلي الدولة والمسؤولين عن طريق بعض الأجهزة وشي سماسرة الإنتخابات باغية تفرق بين قصراوة و كتزرع السموم ديالها بين السكان وكتقول هادو وطنيين وهادو انفصاليين و باغين الفتنة واش أعباد الله لي كيطالب بالحقوق ديالو لي هي حقوق بسيطة بحال بغينا سبيطار ومدرسة وخدمة و البنية التحتية كتنوض الدولة تقولو نتا خائن وباغي الفتنة وانفصالي … ولي كيسرق و ينهب فلوس الشعب بديك الصفقات المشبوهة وكيسرق خيرات البلاد والعباد كيقولو عليه هذا وطني باغي يخدم المدينة غير نتوما كتشوشو عليه …
واش أعباد الله هاد لمدينة ديال القصر الكبير جغرافيا صغيرة مكتعداش 30 كلم حسب تقديري و الناس لي ساكنة فيها مكيتعداوش 200 ألف نسمة و كولشي كيتلاقا كولشي فالمدارس و الجامعات و فالسواق و القهاوي و الشوارع و المساجد و فراس الحومة و كيتفرجو للكرة معا بعضياتهوم وبزاف ديال قصراوة كيتلقاو فالحفلات بحال السبوع والعسر والختانة وحتى فشي حاجة حزينة بحال المرض ولا حوادث السير لا قدر الله وحتى فالگنازة يلا مات شي واحد من الحومة شي كيضامن معا شي بمفهوم عايشين معا بعضنا … هاد الدولة باغية دير صراع بين ولاد المدينة حتى يْوْلِيوْ مخدرين فعقولهوم بلا ما يشعرو ويبداو يدابزو ويخطيو فبعضياتهوم باش ميتوحدوشي ويطالبو بحقوقهوم حيت الدولة لي فيها الشفارة و الفاسدين كتخاف من الإحتجاج ومكتخافش من الشفارة الكبار لي سارقين المدينة و الدولة كاملة ومخليين الشعب كيموت …
وحيت بزاف ديال الشباب مجبرشي الخدمة و فبعض الأحيان مقراش لأن الواليد ديالو مجبرشي باش يشريلو الكتوبة بسباب أن الدولة همشت التعليم وبغات تردو بالفلوس لي بغا يقرا يخلص عاد يقرا فالمدرسة ولا فالجامعة و النتيجة كيخرج داك الشاب للزنقة والغريب أنه كيجبر المخدرات و البابيلا والسيليسيون والشراب و… كيتباعو بحال جافيل والليخية حيت الدولة و المخزن هما السباب باش كتباع هاد المخدرات باش يقتلو هاد الطاقات الشابة …
حيت هوما السباب فالبطالة مداروش للشباب فين يخدم لي قاري و لي مقاريش …
وحتى يلا مرض شي قصراوي كيمشي للسبيطار مكيجبر والو وكيصردوه لشي سبيطار برا المدينة …
حيت حتى الشوارع و الحومات مخربين كاملين عامرين حفاري …
حيت مكيناش الجردة والملعب وحيت مكيناش بزاف ديال الحوايج فهاد المدينة بغينا كولشي يكون يد وحدة يعني بالوحدة و التضامن لي بغيناه يكون يكون …