المغاربة ماعاشوش الحرب وأهوالها وقليل فيهم لي فقد خوه أو باه أو عائلتو كاملة أو دارو فالحرب ، وحتى الإستقلال شديناه باش ماكتب الله والإستعمار خرج خلى للمغرب ركائز الدولة الحديثة

ميكرو طروطوار دارو موقع كود أثناء المسيرة لي تنضمات نهار الأحد لمساندة فلسطين وضد قرار ترامب ، والسؤال كان هو : واش تمشي تجاهد لتحرير القدس ؟ وطبعا أغلب الاجوبة لي ظهرات فالفيديو كلها إيجابية ، وبزاف من الناس هدرو كانو متحمسين ومكرهوش يشدو الطريق داك الساعة ، غير هو لي كتسولوا واش تمشي تجاهد باش تحرر القدس كيجاوب أييه وبأنه مستاعد يتفركع من أجل القدس ، وماشي واحد ماشي جوج بزاف ظهرو فالفيديو عبرو بكل حرية على أنهم مستعدين يتفركعوا من أجل القدس ، واخا محددوش فين بالظبط وكيفاش ولكن بينو على النية وهذا بحد ذاتو موشكيل كبير .
كيفاش حتى تحول تحرير الأرض إلى هجمات إرهابية عبر تفجير النفس وسط الأبرياء، وكيفاش حتى ولاو المغاربة ساخي عليهم راسهم وباغين غير فين يفركعوه ، الصراحة هاداك الفيديو كيخلع وكيبين أننا أمام مغاربة مستاعدين ينفاجروا فأي لحظة خاص غير لي يقنعهم بتبني شي قضية ، وحتى الجهاد بالنسبة ليهم مابقاش كيعني محاربة العدو وإنما الإنفجار فيه ، واش المغاربة ولاو رخاص لهاد الدرجة غير لي تسولوا باغي يتفركع ، واخا ماعارفش حتى علاش ولا كيفاش ولا فين ، هادشي كيعني اننا عايشين مع قنابل موقوتة متجولة ، كتبان عادية فالمظهر الخارجي ولكن لداخل ديالها ساخطة على الدنيا وباغا غير معامن .
فيناهو حب الحياة لي غريزي فالإنسان ، كيفاش حتى مابقاش عند هاد الشباب و ولاو مستعدين يتبناو أي قضية ويموتوا من أجلها غير باش يعطيو لوجودهم معنى مفتقد فهاد البلاد ، حقا المغاربة ماعاشوش الحرب وأهوالها ، وقليل فيهم لي فقد خوه أو باه أو عائلتو كاملة أو دارو فالحرب ، وحتى الإستقلال شديناه باش ماكتب الله ، والإستعمار خرج خلى المغرب مبني بعدا على الأقل وكاين ركائز الدولة الحديثة فيه ، والمغاربة عمرهم تقصفو بالصواريخ والقنبول أو تخباو فالملاجئ ، ومكانوش بانيين بلادهم وريباتها الحرب وعاودوها من الزيرو بحال عدة بلدان ، الحرب عند المغاربة غير شي حاجة كيسمعو بيها ويتفرجوا فيها فالأفلام وفالخبار ، لذا كاع لي سولتيه كتلقاه باغي يحارب سواء من أجل الوطن أو القضية أو العقيدة ، والشباب المغربي لقمة صائغة للتطرف ، راه يالله كيحط رجلو فأحد بؤر التوتر كيلبسوه حزام ناسف ويسيفطوه لأرق سويقة ، إلى كان خاص شي مخطط إستعجالي تديرو الدولة فراه خاص يكون من الأولويات ديالو رفع قيمة المغربي فبلادو ، ومايبقاش رخيص لهاد الدرجة ومستاعد يفركع راسو فأي لحظة