كيفاش صالون بنكيران ولى شخصية سياسية غير كيوقع شي تغيير كيولي حدث. علاش طلع صورتو مع الملك وهبط صورة صاحبو باها؟ رئيس الحكومة السابق : بلا ما تحاولو تفهمو راه موقفي متطرف من الملكية ولن تقوم للمغرب قائمة بدونها

حتى وهو ماشي رئيس حكومة ماشي امين عام لحزب العدالة والتنمية مازال كيصنع الحدث. عبد الاله بنكيران دخل ثقافة جديدة للحقل السياسي. دارو ولات شخصية سياسية ماشي اجتماعية. مناسبة هاد الشي ما اثير منذ ظهور صورة بنكيران مع الكاتب والصحافي بلال التليدي وفالخلفية كاينة صورة "بنكيران مع الراحل عبد الله باها" فبلاصة صورتو مع الملك محمد السادس.
اللي وقع ان صورتو مع الملك طلعها شوية الفوق فنفس الصالون فنفس البلاصة وهبط صورة صاحبو. بنكيران استغرب اللي حاول يشكك فموقفو من الملكية ومن الملك بهاد الشي واكد ان موقفو تابث.
التبرير للي عطاه كما استقته "كود" هو انو باللي ما بقاش رئيس حكومة بدل بلاصتها وحطها الفوق ونزل صاحبو اللي كيقول عليه "درنا هاد الشي مجموعين =الحكومة والحزب= ومشى وخلاني".
بنكيران اكد وعاود اكد باللي موقفو من الملكية متطرف كاع. يعتقد "ان المغرب لن تقوم له قائمة بدون ملكيته" لدرجة٬ يضيف ل"كود"٬ حتى ولاو كيتاهموه صحابو قبل خصومو بالمبالغة فهاد الحب والدفاع عن الملكية