مونديال 2026. المغرب متفوق على مريكان و المسؤولين الكبار فالفيفا مقمرين عليه

عدة تقارير صحفية بينات أن الملف المشترك بين الولايات المتحدة والمكسيك وكندا كيواجه العديد من التحديات الي كتزيد من فرص المغرب في الفوز بتنظيم مونديال 2026.
ومؤخرا، مقال فموقع شبكة إي إس بي إن “ESPN” الرياضية الأمريكية زاد أكد هادشي، حيت ذكر أن المغرب، حسب آخر التقديرات وحسب أقوال مسؤولين تنفيديين كبار فالفيفا، غالب أمريكا، وهو الي رابح أكبر عدد من الأصوات.
ووفقا لما نشره الموقع، أحد المسؤولين الي على اتصال منتظم مع اتحادات القارات قال أن المغرب عندو الدعم ديال آسيا وأمريكا الجنوبية وإفريقيا، وهادشي يقدر يعطيه 104 أصوات الي محتاج.
وأضاف نفس المصدر أن أمريكا مغاديش تقبّل الخسارة بسهولة، خاصة وأنها كتعتابر ملفها احسن من الملف المغربي، وبالنسبة ليها ساهل تربح دولة من شمال إفريقيا فيها 33 مليون نسمة فقط.
لكن بزاف ديال المصادر كتأكد أن الأحداث الي وقعات في الأشهر الماضية، واخا بعض منها ماعندو علاقة بكرة، غادي تأتر وأترات على نتيجة التصويت، وأهم هاذ الأحدات هي الإجراءات الي اتاخدها دونالد ترامب مؤخرا، كمنع بعض الدول العربية من الدخول للولايات المتحدة وحتى الملاحظات ديالو الي كتكرس الصور النمطية… وهادشي نتج عنه مشاعر معادية لأمريكا فالعالم كامل.
من المنتظر نعرفو شكون غادي ينظم المونديال 2026 يوم 13 يونيو المقبل، أي أيام قليلة قبل من ماتش الافتتاح ديال المونديال 2018 بين روسيا والسعودية فموسكو.