مؤشرات كتخلع فقضية بوعشرين. وزير فالحكومة متهم باغتصاب مصرحة فالقضية وشهادة مجهولة يقدر يكون وراها خوه فالحرفة ومصرحات ولاو مشتكيات وعدم تحريك شكايات ضد مسؤولين

قضية بوعشرين مدير نشر “اخبار اليوم” باطرون “ميديا 21″ الناشر لليومية ول”اليوم 24″ و”سلطانة” من حد اول جلسة تقرب والقضية كتزيد غموض. اليوم الموقع الاخباري “برلمان” خرج خبار مزلزل. واحدة مشتكية او مصرحة فالقضية اللي زلزالتنا كلنا قبل ثمانية ايام قالت وفق الجريدة نفسها باللي وزير فحكومة بنكيران والعثماني من حزب العدالة والتنمية دار ليها اللي دار بوعشرين. اغتصاب او تحرش او جنس برضاها. ما كاينش تفاصيل كثيرة. المحاكمة اللي دارت يوم ثامن مارس اي اليوم العالمي للمرأة واللي هو اختيار ماشي اعتباطي طبعا٬ غادية تكشف امور كثيرة.
القضية ديال بوعشرين اللي مازال بريء من كل التهم الموجهة اليه. مازال غير متهم ماشي مدان. القضاء ايلى كان نزيه بصاح غادي يصدر حكمو ونعرفو. لكن قبل هاد الشي كاينة مؤشرات فشي شكل.
اول حاجة علاش غير بوعشرين بوحدو. علاش ما تفتحاش ملفات مدراء مؤسسات كبيرة اخرها قضية مدير دوزيم سليم الشيخ اللي تهماتو صحافية كانت معاهم بنفس تهم بوعشرين. مؤسسات عمومية عاشت على وقع فضايح بحال هادي وما عرفاتش بحال هاد الشي. كتقولو العدد ما كانش كبير. التسجيل بالفيديو ما كانش. الرد باش عرفتو باللي العدد ماشي كثير وعلاش تصدرو دابا حكم على هاد الفيديوهات. دابا بوعشرين كيف قالو محاميه كيشكك فيهم. باش نعرفو امور كثيرة منها شكون ركب لبوعشرين الكاميرات فالمقر والفاكتورات ديالها ويتم استدعاء المكلف بهاد الشي وطبعا باش تكشف النيابة العامة على اش لقاو عند بوعشرين فالكمبيوتر ديالو فالتلفون ديالو فالايباد ديالو غاديين نحسمو هاد الموضوع.
الشكاية المجهولة اللي تقالت تحطات واخا ما خداوش بها تكشف جزء من هاد القضية. شكون حط الشكاية. الريحة كتبان ديال شي خوه فالحرفة. شي حد كيعرفو. سبق خدم معا. عندو معرفة بيه. حقاش ماشي ضحية اللي حطاتها ماشي من لبنات اللي بانو فالفيديو. لانه من الغباء تحطها وهي عارفة البوليس غادي يستامع ليهم باش يبانو فالفيديو. من بعد جوجت لبنات حطو الشكاية. وحدة كتقول محاولة اغتصاب. ما كنظنش القيامة تنوض على اتهام بمحاولة اغتصاب واللي عندها الدخول والخروج فالهدرة.
دابا السؤال؟ واش هاد التتابع ديال الاحداث فقضية بوعشرين صدفة ولا مؤامرة كيف قال بوعشرين عبر محاميه. قال باللي غادي يكشف المؤامرة كلها يوم المحاكمة.
اسئلة تكشف باللي كاينة مناطق ما واضحاش. غادية توضح فالمحاكمة يمكن بعد يمكن قبل. يمكن مع خروج هاد المشتكيات او المصرحات بتدوينات او حوارات غادي يكشف هاد المناطق غير الواضحة. طبعا خاص التفكير فالضحايا. خاص يكونو دارو هاد الشي حقاش تم اغتصابهم او التحرش بيهم ثم تصوير هاد الشي ماشي لاعتبارات اخرى. ارتباط بعضهن يقدر يضعف شهادتهم ويغدي نظرية المؤامرة.