خاص محاكمة العديد من المسؤولين والمنتخبين لي دازو فهاد البلاد وكانو جزء من الفساد بتهمة زعزعة الشعور القومي للمغاربة، حيث كرهو المغاربة فبلادهم وولاو باغين ليها غير لخسارة

آشنو لي طرا لينا كمغاربة ؟ وفوقاش فقد المغربي الإعتزاز ديالو بذاتو وبلادو ؟ وكيفاش حتى فقد المغربي التقة فالبلاد ومستقبلها وفشي حاجة زينة تجي من جيهتها ؟ وفقد التقة فبرامجها المستقبلية ومخططاتها والمنافسات لي داخلة ليها ؟هادي أسئلة خاص نطرحوها كاملين ملي نشوفو هاد الحملة المضادة لملف الترشيح ديال المغرب لكأس العالم ، ولي دايرينها المغاربة سواء فالمواقع الإجتماعية أو فالواقع ، وواخا ممنضماش على شكل هيئة ، ولكن فالواقع راها على شكل حملة مضادة وبكل مقوماتها ، هدفها هو يخسر المغرب رهان تنظيم كأس العالم ويخسر أي رهان او منافسة دخل ليها .
وهادشي موقعش غير مع ملف الترشيح لكاس العالم ، بل سنوات هادي وهو جاي وكيكبر وكينتاشر ، حتى وصل كاع لتسفيه تأهل المنتخب لكأس العالم ، تسفيه الأوراش الكبرى والمشاريع ديال الدولة ، راه هادشي ماشي مجرد امتعاض فئة من الناس على الأحوال فالبلاد وتصريف هاد الإمتعاض على شكل معاداة لكل ماهو جاي من طرف الدولة ولو فيه الخير للبلاد والعباد إلى أن التعامل معاه كيتم بواحد الريبة وسوء نية مبطنة .
المغاربة مكانوش هاكة ولكن خدلان الدولة والحكومات المتعاقبة والمسيرين والمسؤولين ورجال الدولة ليهم سنوات بعد سنوات ، فقدو الثقة فالدولة ولي يجي منها ، حيث عمرو ماغادي يصدق وحيث فالواقع شافو مشاريع كثيرة توعدو بيها المغاربة وباقي لحد الآن مكايناش ، وكل عام حياتهم كتقواد على العام لي قبلو ، وكل حكومة كتخلف بالوعود ديالها ، لدرجة بزاف ديال المغاربة تزعزع عندهم الشعور الوطني ، وولاو معادين للدولة وحاقدين عليها ، وهادشي نتيجة لإهمال الدولة لأجيال ديال المغاربة كبرو بلا مايحسو بالدولة كاينة ، وحتى نهار كيوقفو فمجال الصحة أو الأمن أو التعليم وباقي الخدمات والقطاعات مكيلقاوهاش، وهي كتعرفهم غير فالزيادات والضرائب ، خاص محاكمة العديد من المسؤولين والمنتخبين لي دازو فهاد البلاد وكانو جزء من الفساد بتهمة زعزعة السعور القومي للمغاربة ، حيث كرهو المغاربة فبلادهم ، وولاو باغين ليها غير لخسارة .